سیدہ ام قیس بنت محصن رضی اللہ عنہا سے روایت ہے کہ ”وہ اپنے ایک چھوٹے بچے کو رسول اللہ صلی اللہ علیہ وسلم کی خدمت میں لائیں، اس نے ابھی کھانا کھانا شروع نہیں کیا تھا، آپ صلی اللہ علیہ وسلم نے اسے اپنی گود میں بٹھا لیا، پس اس نے آپ صلی اللہ علیہ وسلم کے کپڑے پر پیشاب کر دیا تو آپ صلی اللہ علیہ وسلم نے پانی منگویا اور اس پر چھڑک دیا اور اسے دھویا نہیں۔“ [سنن ابي داود/كِتَاب الطَّهَارَةِ/حدیث: 374]

سیدہ لبابہ بنت حارث رضی اللہ عنہا بیان کرتی ہیں کہ سیدنا حسین بن علی رضی اللہ عنہ رسول اللہ صلی اللہ علیہ وسلم کی گود میں تھے کہ پیشاب کر دیا تو میں نے کہا: ”آپ دوسرا کپڑا پہن لیں اور یہ چادر مجھے دے دیں کہ اسے دھو دوں۔“ آپ صلی اللہ علیہ وسلم نے فرمایا: ”صرف لڑکی کا پیشاب ہی دھویا جاتا ہے اور لڑکے کے پیشاب پر چھینٹے مارے جاتے ہیں۔“ [سنن ابي داود/كِتَاب الطَّهَارَةِ/حدیث: 375]

سیدنا ابو سمح رضی اللہ عنہ کہتے ہیں کہ میں نبی کریم صلی اللہ علیہ وسلم کی خدمت کیا کرتا تھا۔ آپ صلی اللہ علیہ وسلم جب غسل کرنا چاہتے تو مجھے فرماتے ”میری طرف اپنی گدی (پشت) کر لو۔“ تو میں آپ کی طرف گدی کر کے کھڑا ہو جاتا اور آپ صلی اللہ علیہ وسلم کو اس طرح پردہ کرتا۔ (ایک بار) سیدنا حسین اور حسن رضی اللہ عنہما کو لایا گیا تو انہوں نے آپ صلی اللہ علیہ وسلم کے سینے پر پیشاب کر دیا۔ میں اسے دھونے آیا تو آپ صلی اللہ علیہ وسلم نے فرمایا ”لڑکی کا پیشاب دھویا جاتا ہے اور لڑکے کے پیشاب پر چھینٹے مارے جاتے ہیں۔“ عباس (عباس بن عبدالعظیم) نے اپنی سند میں ( «حدثني» مفرد کے صیغے کے بجائے) «حدثنا يحيى بن الوليد» ذکر کیا۔ امام ابوداؤد رحمہ اللہ کہتے ہیں اور وہ ابو الزعراء ہے اور ہارون بن تمیم نے جناب حسن بصری رحمہ اللہ سے نقل کیا ہے کہ ”پیشاب سب برابر ہے۔“ [سنن ابي داود/كِتَاب الطَّهَارَةِ/حدیث: 376]

سیدنا علی رضی اللہ عنہ سے منقول ہے کہ: ”لڑکی کا پیشاب دھویا جائے اور لڑکے کے پیشاب پر چھینٹے مارے جائیں جب تک کہ کھانا نہ کھاتا ہو۔“ [سنن ابي داود/كِتَاب الطَّهَارَةِ/حدیث: 377]

سیدنا علی بن ابی طالب رضی اللہ عنہ سے مروی ہے کہ نبی کریم صلی اللہ علیہ وسلم نے فرمایا، پھر مذکورہ بالا حدیث کے ہم معنی روایت کیا ہے، مگر اس میں ”جب تک کہ کھانا نہ کھاتا ہو۔“ کا بیان نہیں ہے، مگر یہ اضافہ کیا ہے کہ قتادہ رحمہ اللہ نے کہا: ”یہ حکم اس وقت تک ہے جب کہ وہ دونوں (لڑکا، لڑکی) کھانا نہ کھاتے ہوں۔ جب کھانا کھانے لگ جائیں تو دونوں کا پیشاب دھویا جائے۔“ [سنن ابي داود/كِتَاب الطَّهَارَةِ/حدیث: 378]

جناب حسن بصری اپنی والدہ سے راوی ہیں، وہ بیان کرتی ہیں کہ ”انہوں نے سیدہ ام سلمہ رضی اللہ عنہا کو دیکھا کہ وہ لڑکے کے پیشاب پر چھینٹے مارتیں جب تک کہ وہ کھانا نہ کھاتا، جب کھانا کھانے لگتا تو اس کو دھوتی تھیں اور لڑکی کے پیشاب کو دھوتی تھیں۔“ [سنن ابي داود/كِتَاب الطَّهَارَةِ/حدیث: 379]