سیدنا انس بن مالک رضی اللہ عنہ بیان کرتے ہیں: ایک مرتبہ ہم نبی اکرم صلی اللہ علیہ وسلم کے پاس موجود تھے، آپ مسکرا دیے، آپ صلی اللہ علیہ وسلم نے فرمایا: ”کیا تم لوگ یہ بات جانتے ہو کہ میں کس بات پر مسکرایا ہوں؟“ ہم نے عرض کی: اللہ اور اس کا رسول زیادہ بہتر جانتے ہیں۔ نبی اکرم صلی اللہ علیہ وسلم نے فرمایا: ”ایک بندے کے اپنے پروردگار سے گفتگو کرنے پر (مجھے ہنسی آ گئی)، وہ بندہ یہ کہے گا: اے میرے پروردگار! کیا تو نے مجھے ظلم سے نہیں بچایا؟ پروردگار فرمائے گا: جی ہاں۔ بندہ عرض کرے گا: تو پھر میں اپنے خلاف کسی بھی شخص کی گواہی کو قبول نہیں کروں گا، کوئی ایسا گواہ ہونا چاہیے جو میری طرف سے ہو، تو پروردگار فرمائے گا: آج کے دن تمہارا اپنا وجود تمہارے خلاف گواہ ہونے کے لیے کافی ہے اور معزز فرشتے بھی تمہارے خلاف گواہ ہیں۔ پھر اس شخص کے منہ پر مہر لگائی جائے گی اور اس کے اعضا سے یہ کہا جائے گا: تم کلام کرو۔ پھر وہ اعضا اس کے اعمال کے بارے میں کلام کریں گے۔ پھر اسے بولنے کا موقع دیا جائے گا، تو وہ یہ کہے گا: تم لوگ دور ہو جاؤ، پرے ہو جاؤ، میں تو تمہیں بچانے کے لیے (پروردگار سے) گفتگو کر رہا تھا۔“ [صحیح ابن حبان/كِتَابُ إِخْبَارِهِ ﷺ عَنْ مَنَاقِبِ الصَّحَابَةِ رِجَالِهِمْ وَنِسَائِهِمْ بِذِكْرِ أَسْمَائِهِمْ رِضْوَانُ اللَّهِ عَلَيْهِمْ أَجْمَعِينَ/حدیث: 7358]