سیدنا ابوہریرہ رضی اللہ عنہ کا بیان ہے کہ ”میرے خلیل صلی اللہ علیہ وسلم نے مجھے تین باتوں کی وصیت فرمائی، میں انہیں سفر و حضر میں نہیں چھوڑتا، چاشت کی دو رکعتیں، ہر مہینے میں تین روزے اور یہ کہ وتر پڑھے بغیر نہ سوؤں۔“ [سنن ابي داود/كتاب تفريع أبواب الوتر /حدیث: 1432]

سیدنا ابوالدرداء رضی اللہ عنہ بیان کرتے ہیں کہ ”میرے خلیل صلی اللہ علیہ وسلم نے مجھے تین باتوں کی وصیت فرمائی تھی، میں انہیں کسی صورت نہیں چھوڑتا۔ مجھے وصیت فرمائی کہ ہر مہینے تین دن کے روزے رکھوں، وتر پڑھ کر سویا کروں اور ضحٰی کے نفل پڑھوں سفر اور حضر میں۔“ [سنن ابي داود/كتاب تفريع أبواب الوتر /حدیث: 1433]

سیدنا ابوقتادہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے سیدنا ابوبکر رضی اللہ عنہ سے پوچھا: ”تم وتر کس وقت پڑھتے ہو؟“ انہوں نے کہا: ”میں رات کے اول حصے میں پڑھتا ہوں۔“ سیدنا عمر رضی اللہ عنہ سے پوچھا کہ وتر کس وقت پڑھتے ہو؟ انہوں نے کہا کہ ”میں رات کے آخری حصے میں پڑھتا ہوں۔“ آپ صلی اللہ علیہ وسلم نے سیدنا ابوبکر رضی اللہ عنہ کے متعلق فرمایا: ”اس نے احتیاط کو اختیار کیا ہے۔“ اور سیدنا عمر رضی اللہ عنہ کے بارے میں فرمایا: ”اس نے عزم و قوت کو اختیار کیا ہے۔“ [سنن ابي داود/كتاب تفريع أبواب الوتر /حدیث: 1434]