حارث بن اَقیش رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جن دو مسلمانوں کے تین بچے بلوغت کی عمر کو پہنچنے سے پہلے فوت ہو جائیں، اللہ تعالیٰ ان دونوں (والدین) پر اپنی رحمت کے فضل سے انہیں جنت میں داخل فرما دے گا۔“ لوگوں نے عرض کیا: یا رسول اللہ! اور جس کے دو بچے فوت ہوئے ہوں؟ آپ صلی اللہ علیہ وسلم نے فرمایا: ”اور جس کے دو بچے (فوت ہوئے ہوں اسے بھی)۔“ اور رسول اللہ صلی اللہ علیہ وسلم نے مزید فرمایا: ”بے شک میری امت میں ایسے لوگ بھی ہیں جن کی شفاعت کی بدولت (قبیلہ) مُضَر کی کل تعداد سے بھی زیادہ لوگ جنت میں داخل ہوں گے، اور میری امت میں کوئی ایسا (گناہگار) بھی ہو گا جسے جہنم کے لیے اتنا بڑا کر دیا جائے گا کہ وہ اس کا ایک کونا بن جائے گا۔“
اس حدیث کی سند امام مسلم کی شرط پر صحیح ہے، اور حارث بن اقیش کا ذکر ائمہ کی مسانید میں موجود ہے، اور یہ اسی قبیل سے ہے جس کا ہم نے پہلے ذکر کیا کہ ایک تابعی کا کسی صحابی سے روایت کرنے میں منفرد ہونا (شیخین کے ہاں علت ہے)۔ [المستدرك على الصحيحين/كِتَابُ الْإِيمَانِ/حدیث: 239]

حارث بن اَقیش رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”میری امت کا ایک آدمی (ایسا بھی ہوگا جو) جنت میں داخل ہوگا، پھر وہ (قبیلہ) مُضَر کی کل تعداد سے بھی زیادہ لوگوں کی شفاعت کرے گا۔“ [المستدرك على الصحيحين/كِتَابُ الْإِيمَانِ/حدیث: 240]