سیدنا عثمان رضی اللہ عنہ سے مروی ہے کہ نبی کریم صلی اللہ علیہ وسلم نے فرمایا: ”تم میں سب سے بہتر وہ شخص ہے جو قرآن سیکھتا اور سکھاتا ہے۔“ [سنن ابي داود/كتاب تفريع أبواب الوتر /حدیث: 1452]

سیدنا سہل بن معاذ جہنی رحمہ اللہ اپنے والد (سیدنا معاذ بن انس الجہنی رضی اللہ عنہ) سے روایت کرتے ہیں، ان کا بیان ہے کہ رسول اللہ صلی اللہ علیہ وسلم نے فرمایا: ”جس نے قرآن پڑھا اور جو اس میں ہے اس پر عمل کیا، تو قیامت کے دن اس کے ماں باپ کو ایک تاج پہنایا جائے گا جس کی روشنی دنیا کے گھروں میں موجود سورج کی روشنی سے بھی زیادہ خوبصورت ہو گی، اگر وہ تمہارے گھروں میں ہوتا۔ (جب ماں باپ کا یہ درجہ ہے) تو تمہارا کیا خیال ہے خود اس پر عمل کرنے والے کا کیا مقام ہو گا۔“ [سنن ابي داود/كتاب تفريع أبواب الوتر /حدیث: 1453]

ام المؤمنین سیدہ عائشہ رضی اللہ عنہا سے مروی ہے کہ نبی کریم صلی اللہ علیہ وسلم نے فرمایا: ”جو شخص قرآن پڑھتا ہے اور وہ اس میں ماہر ہے، وہ اعمال نامہ لکھنے والے معزز اور اطاعت گزار فرشتوں کے ساتھ ہو گا۔ اور جو شخص قرآن پڑھتا ہے، مگر اسے پڑھنے میں مشقت ہوتی ہے (اٹک اٹک کر پڑھتا ہے) تو اس کے لیے دو اجر ہیں۔“ [سنن ابي داود/كتاب تفريع أبواب الوتر /حدیث: 1454]

سیدنا ابوہریرہ رضی اللہ عنہ نبی کریم صلی اللہ علیہ وسلم سے روایت کرتے ہیں کہ آپ صلی اللہ علیہ وسلم نے فرمایا: ”جو لوگ اللہ کے گھروں میں سے کسی گھر میں جمع ہو کر کتاب اللہ کی تلاوت کرتے اور آپس میں اس کا درس و مذاکرہ کرتے ہیں تو ان پر سکینت نازل ہوتی ہے، رحمت انہیں ڈھانپ لیتی ہے، فرشتے انہیں اپنے گھیرے میں لے لیتے ہیں اور اللہ عزوجل ان کا ذکر ان میں کرتا ہے جو اس کے پاس ہوتے ہیں۔“ (ملائکہ مقربین میں۔) [سنن ابي داود/كتاب تفريع أبواب الوتر /حدیث: 1455]

سیدنا عقبہ بن عامر جہنی رضی اللہ عنہ بیان کرتے ہیں کہ رسول اللہ صلی اللہ علیہ وسلم ہمارے ہاں تشریف لائے جبکہ ہم صُفہ میں تھے۔ آپ صلی اللہ علیہ وسلم نے فرمایا: ”تم میں سے کون پسند کرتا ہے کہ بطحان یا وادیِ عقیق میں جائے اور وہاں سے موٹی تازی، خوبصورت، اونچے کوہان والی دو اونٹنیاں لے آئے اور اس میں کسی گناہ یا قطع رحمی کا مرتکب بھی نہ ہو؟“ ہم نے عرض کیا: ”اے اللہ کے رسول صلی اللہ علیہ وسلم ! ہم سب یہ چاہتے ہیں۔“ آپ صلی اللہ علیہ وسلم نے فرمایا: ”تمہارا ہر روز مسجد جا کر کتاب اللہ سے دو آیتیں سیکھ لینا، دو اونٹنیوں کے حصول سے بہتر ہے، اگر تین آیتیں سیکھے تو تین اونٹنیوں سے بہتر ہے۔ اسی طرح مزید آیتوں کی تعداد کے مطابق اونٹنیوں سے بہتر ہے۔“ جناب ابو عبید رحمہ اللہ نے «كَوْمَاء» کا ترجمہ بیان کیا کہ ”اونچے کوہان والی اونٹنی۔“ [سنن ابي داود/كتاب تفريع أبواب الوتر /حدیث: 1456]