سیدنا یحیی بن عبداللہ بن ابی قتادہ رضی اللہ عنہ اپنے والد کا بیان نقل کرتے ہیں: جب رسول اکرم صلی اللہ علیہ وسلم مدینہ منورہ تشریف لائے تو سیدنا براء بن معرور رضی اللہ عنہ کے متعلق پوچھا: تو لوگوں نے بتایا کہ وہ وفات پا چکے ہیں اور یا رسول اللہ صلی اللہ علیہ وسلم ! انہوں نے آپ کے لیے اپنے ایک تہائی مال کی وصیت بھی کی ہے اور انہوں نے یہ بھی وصیت کی تھی کہ جب ان کا انتقال ہو جائے تو ان کا چہرہ قبلہ کی جانب کر دیا جائے۔ تو رسول اللہ صلی اللہ علیہ وسلم نے فرمایا: ان کا عمل فطرت کے عین مطابق ہے۔ اور میں اس کا ثلث (تیسرا حصہ جو اس نے میرے لیے وصیت کیا ہے) اس کے بچوں کو دیتا ہوں، پھر آپ صلی اللہ علیہ وسلم نے ان کی نماز جنازہ پڑھی اور یوں دعا مانگی ” اللَّهُمَّ اغْفِرْ لَهُ وَارْحَمْهُ، وَأَدْخِلْهُ جَنَّتَكَ “ اے اللہ! اس کی مغفرت فرما اور اس کو اپنی جنت میں داخل فرما۔ اور بے شک تو نے ایسا کر دیا۔ ٭٭ یہ حدیث ” صحیح “ ہے کیونکہ امام بخاری رحمۃ اللہ علیہ نے ” نعیم بن حماد “ کی روایات نقل کی ہیں اور امام مسلم رحمۃ اللہ علیہ بن حجاج نے ” دراوردی “ کی روایات نقل کی ہیں۔ لیکن یہ حدیث نقل نہیں کی۔ اور میری نظر میں اس حدیث کے علاوہ اور کوئی حدیث ایسی نہیں ہے، جس سے موت کے وقت چہرہ قبلہ کی طرف کرنا ثابت ہوتا ہو۔ [المستدرك على الصحيحين/كِتَابُ الْجَنَائِزِ/حدیث: 1321]

سیدنا سلیمان بن بریدہ رضی اللہ عنہ اپنے والد کا یہ بیان نقل کرتے ہیں کہ جب صحابہ کرام رضی اللہ عنہم رسول اکرم صلی اللہ علیہ وسلم کو غسل دینے لگے تو ایک نداء آئی (وہ نداء یہ تھی) ” رسول اللہ صلی اللہ علیہ وسلم کی قمیص مت اتارو۔“ ٭٭ یہ حدیث امام بخاری رحمۃ اللہ علیہ و امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ [المستدرك على الصحيحين/كِتَابُ الْجَنَائِزِ/حدیث: 1322]