سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم جب کوئی نماز جنازہ پڑھاتے تو اس میں یوں دعا مانگا کرتے تھے۔ ” اللَّهُمَّ اغْفِرْ لِحَيِّنَا وَمَيِّتِنَا، وَشَاهِدِنَا وَغَائِبِنَا، وَصَغِيرِنَا وَكَبِيرِنَا، وَذَكَرِنَا وَأُنْثَانَا، اللَّهُمَّ مَنْ أَحْيَيْتَهُ مِنَّا فَأَحْيِهِ عَلَى الْإِسْلَامِ، وَمَنْ تَوَفَّيْتَهُ مِنَّا فَتَوَفَّهُ عَلَى الْإِيمَانِ “۔ ” اے اللہ ہمارے زندوں، مردوں حاضر و غائب، چھوٹے، بڑے اور مردوں اور عورتوں کی مغفرت فرما “۔ یا اللہ تو ہم میں سے جس کو زندہ رکھے اس کو اسلام پر زندہ رکھ اور جس کو موت دے اسے ایمان پر موت عطا کر۔ ٭٭ یہ حدیث امام بخاری رحمۃ اللہ علیہ و امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ مذکورہ حدیث کی ایک شاہد حدیث موجود ہے۔ جو کہ امام مسلم رحمۃ اللہ علیہ کے معیار کے مطابق صحیح ہے۔ [المستدرك على الصحيحين/كِتَابُ الْجَنَائِزِ/حدیث: 1342]

سیدنا ابوسلمہ بن عبدالرحمن رضی اللہ عنہ فرماتے ہیں: میں نے ام المومنین سیدہ عائشہ رضی اللہ عنہا سے پوچھا: نبی اکرم صلی اللہ علیہ وسلم نماز جنازہ کیسے پڑھا کرتے تھے؟ انہوں نے جواباً فرمایا: آپ یوں دعا مانگا کرتے تھے:” اللَّهُمَّ اغْفِرْ لِحَيِّنَا وَمَيِّتِنَا، وَذَكَرِنَا وَأُنْثَانَا، وَشَاهِدِنَا وَغَائِبِنَا، وَصَغِيرِنَا وَكَبِيرِنَا، اللَّهُمَّ مَنْ أَحْيَيْتَهُ مِنَّا فَأَحْيِهِ عَلَى الْإِسْلَامِ، وَمَنْ تَوَفَّيْتَهُ مِنَّا فَتَوَفَّهُ عَلَى الْإِيمَانِ۔“ [المستدرك على الصحيحين/كِتَابُ الْجَنَائِزِ/حدیث: 1343]

سیدنا یزید بن عبداللہ بن رکانہ بن عبدالمطلب رضی اللہ عنہ روایت کرتے ہیں کہ نبی اکرم صلی اللہ علیہ وسلم جب جنازہ پڑھتے تو اس میں یوں دعا مانگتے ” اللَّهُمَّ عَبْدُكَ، وَابْنُ أَمَتِكَ احْتَاجَ إِلَى رَحْمَتِكَ، وَأَنْتَ غَنِيٌّ عَنْ عَذَابِهِ إِنْ كَانَ مُحْسِنًا فَزِدْ فِي إِحْسَانِهِ، وَإِنْ كَانَ مُسِيئًا فَتَجَاوَزَ عَنْهُ۔“ ” اے اللہ! یہ تیرا بندہ ہے اور تیری بندی کا بیٹا ہے۔ (یا اللہ) یہ تیری رحمت کا محتاج ہے اور تو اس کے عذاب سے بے نیاز ہے، اگر یہ نیک ہے تو اس کی نیکیوں میں اضافہ فرما اور اگر یہ گنہگار ہے تو اس کو معاف فرما۔“ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا، اور یزید بن رکانہ اور ان کے والد ” سیدنا رکانہ بن عبدالمطلب “ دونوں صحابی ہیں اور عبدالمطلب بن عبدمناف کی اولاد امجاد میں سے ہیں۔ [المستدرك على الصحيحين/كِتَابُ الْجَنَائِزِ/حدیث: 1344]

سیدنا شرحبیل بن سعد رضی اللہ عنہ فرماتے ہیں: سیدنا عبداللہ بن عباس رضی اللہ عنہما نے ابواء میں ہمیں نماز جنازہ پڑھائی۔ انہوں نے تکبیر کہی پھر بلند آواز سے ” سورہ فاتحہ “ پڑھی پھر نبی اکرم صلی اللہ علیہ وسلم پر درود پڑھا پھر یوں دعا مانگی ” اللَّهُمَّ عَبْدُكَ، وَابْنُ عَبْدِكَ، وَابْنُ أَمَتِكَ، يَشْهَدُ أَنْ لَا إِلَهَ إِلَّا أَنْتَ وَحْدَكَ لَا شَرِيكَ لَكَ، وَيَشْهَدُ أَنَّ مُحَمَّدًا عَبْدُكَ وَرَسُولُكَ، أَصْبَحَ فَقِيرًا إِلَى رَحْمَتِكَ، وَأَصْبَحْتَ غَنِيًّا عَنْ عَذَابِهِ، يُخَلَّى مِنَ الدُّنْيَا وَأَهْلِهَا، إِنْ كَانَ زَاكِيًا فَزَكِّهِ، وَإِنْ كَانَ مُخْطِئًا فَاغْفِرْ لَهُ اللَّهُمَّ لَا تَحْرِمْنَا أَجْرَهُ، وَلَا تُضِلَّنَا بَعْدَهُ “ ” اے اللہ یہ تیرا بندہ ہے اور تیرے بندے کا بیٹا ہے اور تیری بندی کا بیٹا ہے، یہ گواہی دیتا ہے کہ تیرے سوا کوئی عبادت کے لائق نہیں، تو تنہا ہے، تیرا کوئی شریک نہیں اور یہ گواہی دیتا ہے کہ محمد رسول اللہ صلی اللہ علیہ وسلم تیرے بندے اور رسول ہیں، یہ تیری رحمت کا محتاج ہے۔ تو اس کی مغفرت فرما۔ اے اللہ! تو ہمیں اس کے اجر سے محروم نہ رکھ اور اس کے بعد ہمیں گمراہ نہ کر۔“ پھر انہوں نے تین تکبیریں کہیں، پھر نماز سے فارغ ہو کر فرمایا: اے لوگو! میں نے بلند آواز سے اس لیے پڑھا ہے تاکہ تم جان لو کہ یہ سنت ہے۔ ٭٭ امام بخاری رحمۃ اللہ علیہ اور امام مسلم رحمۃ اللہ علیہ نے شرحبیل بن سعد کی روایات نقل نہیں کیں اور یہ مدنی تابعین میں سے ہیں اور میں نے اس حدیث کو سابقہ احادیث کے شاہد کے طور پر نقل کیا ہے کیونکہ گزشتہ احادیث مختصر تھیں اور یہ تفصیلی ہے۔ [المستدرك على الصحيحين/كِتَابُ الْجَنَائِزِ/حدیث: 1345]

سیدنا عبداللہ بن ابی اوفیٰ رضی اللہ عنہ فرماتے ہیں: ان کی بیٹی کا انتقال ہو گیا، وہ ایک خچر پر سوار جنازے کے پیچھے آ رہے تھے اور عورتیں مرثیے پڑھ رہی تھیں، انہوں نے کہا: یہ عورتیں مرثیے پڑھیں یا نہ پڑھیں، رسول اللہ صلی اللہ علیہ وسلم نے مرثیے پڑھنے سے منع فرمایا ہے۔ البتہ آنسو جتنے چاہیں بہا سکتی ہیں۔ پھر اس کی نماز جنازہ پڑھائی اور چار تکبیریں پڑھیں۔ پھر آپ چوتھی تکبیر کے بعد اتنی دیر کھڑے میت کے لیے دعا و استغفار کرتے رہے جتنی دیر دو تکبیروں کے درمیان کا دورانیہ تھا اور انہوں نے فرمایا: رسول اللہ صلی اللہ علیہ وسلم ایسے ہی کیا کرتے تھے۔ ٭٭ یہ حدیث صحیح ہے لیکن امام بخاری اور امام مسلم نے اس کو نقل نہیں کیا۔ اور ابراہیم بن مسلم ہجری پر کوئی مدلل جرح ثابت نہیں ہے۔ [المستدرك على الصحيحين/كِتَابُ الْجَنَائِزِ/حدیث: 1346]

سیدنا ابوعامر بن سھل بن حنیف رضی اللہ عنہ انصار کے علماء اور معزز لوگوں میں شمار ہوتے ہیں اور یہ ان لوگوں میں سے ہیں جو رسول اللہ صلی اللہ علیہ وسلم کے ہمراہ غزوہ بدر میں شریک ہوئے۔ ان کو رسول اللہ صلی اللہ علیہ وسلم کے صحابہ رضی اللہ عنہم میں سے بعض نے نماز جنازہ کے متعلق بتایا کہ امام تکبیر کہے گا، پھر نبی اکرم صلی اللہ علیہ وسلم پر درود پڑھے گا اور تین تکبیرات پر نماز پوری کرے گا اور آخر میں مختصر سلام پھیرے گا اور نماز کے بعد سنت وہ ہے جو ابوامامہ نے عمل کیا۔ ٭٭ زہری کہتے ہیں: یہ حدیث مجھے ابوامامہ نے بتائی اور ابن مسیب نے اس کو سنا، لیکن اس پر انکار نہیں کیا۔ ابن شہاب کہتے ہیں: ابوامامہ نے نماز جنازہ کا جو طریقہ مجھے بتایا تھا، میں نے وہ محمد بن سوید کے سامنے ذکر کیا تو انہوں نے کہا: میں نے ضحاک بن قیس کو حبیب بن مسلمہ کے حوالے سے ایک نماز جنازہ کے دوران ابوامامہ جیسی حدیث بیان کرتے سنا ہے۔ یہ حدیث امام بخاری رحمۃ اللہ علیہ و امام مسلم رحمۃ اللہ علیہ دونوں کے معیار کے مطابق صحیح ہے لیکن دونوں نے ہی اسے نقل نہیں کیا۔ اور نماز جنازہ میں ایک سلام کے متعلق اس سے زیادہ صحیح حدیث کوئی نہیں ہے۔ ابوعنبس سعید بن کثیر کی سند کے ہمراہ مذکورہ حدیث کی شاہد حدیث موجود ہے (جو کہ درج ذیل ہے) [المستدرك على الصحيحين/كِتَابُ الْجَنَائِزِ/حدیث: 1347]

سیدنا ابوہریرہ رضی اللہ عنہ سے مروی ہے کہ رسول اللہ صلی اللہ علیہ وسلم نے ایک نماز جنازہ پڑھائی، اس میں چار تکبیریں کہیں اور ایک سلام۔ ٭٭ نماز جنازہ میں ایک سلام کے متعلق سیدنا علی بن ابی طالب عبداللہ بن عمرو، عبداللہ بن عباس، جابر بن عبداللہ بن ابی اوفیٰ اور سیدنا ابوہریرہ رضی اللہ عنہم سے یہ صحیح روایت منقول ہے کہ یہ لوگ نماز جنازہ میں ایک سلام پھیرا کرتے تھے۔ [المستدرك على الصحيحين/كِتَابُ الْجَنَائِزِ/حدیث: 1348]