سیدہ جویریہ بنت حارث رضی اللہ عنہا بیان کرتی ہیں: ”اللہ کی قسم! رسول اللہ صلی اللہ علیہ وسلم نے اپنی وفات کے وقت نہ کوئی دینار چھوڑا، نہ درہم، نہ کوئی غلام اور نہ ہی کوئی لونڈی، سوائے اپنے سفید خچر، اپنے اسلحہ اور اس زمین کے جسے آپ صلی اللہ علیہ وسلم نے صدقہ کر دیا تھا۔“
یہ حدیث صحیح ہے اور امام بخاری نے اسے روایت کیا ہے۔ [المستدرك على الصحيحين/كِتَابُ الزَّكَاةِ/حدیث: 1542]

ابوعبدالرحمن سلمی بیان کرتے ہیں کہ جب سیدنا عثمان بن عفان رضی اللہ عنہ (اپنے گھر میں) محصور کیے گئے تو انہوں نے اپنے گھر کی چھت سے لوگوں کی طرف جھانک کر فرمایا: ”میں تمہیں اللہ کا واسطہ دے کر پوچھتا ہوں، کیا تم جانتے ہو کہ بئرِ رومہ کا پانی کوئی شخص قیمت ادا کیے بغیر نہیں پی سکتا تھا، تو میں نے اسے اپنے مال سے خریدا اور اسے غنی، فقیر اور مسافر سب کے لیے وقف کر دیا؟“ لوگوں نے جواب دیا: ”جی ہاں (ہم جانتے ہیں)۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ الزَّكَاةِ/حدیث: 1543]