سیدنا ابوسعید خدری رضی اللہ عنہ سے روایت ہے کہ ایک عورت نبی کریم صلی اللہ علیہ وسلم کی خدمت میں حاضر ہوئی جبکہ ہم آپ کے پاس موجود تھے، اس نے عرض کیا: ”اے اللہ کے رسول! میرا شوہر صفوان بن معطل جب میں نماز پڑھتی ہوں تو مجھے مارتا ہے، جب میں روزہ رکھتی ہوں تو میرا روزہ تڑوا دیتا ہے، اور وہ سورج نکلنے تک فجر کی نماز نہیں پڑھتا۔“ راوی کہتے ہیں کہ صفوان وہیں موجود تھے، تو آپ صلی اللہ علیہ وسلم نے ان سے اس خاتون کی شکایت کے بارے میں پوچھا، انہوں نے عرض کیا: ”اے اللہ کے رسول! جہاں تک اس کے اس قول کا تعلق ہے کہ میں اسے نماز پڑھنے پر مارتا ہوں، تو یہ (نماز میں) ایسی دو لمبی سورتیں پڑھتی ہے جن سے میں نے اسے منع کیا ہے، میں نے اسے کہا کہ اگر ایک ہی سورت پڑھی جائے تو وہ لوگوں کے لیے کافی ہے؛ اور اس کا یہ کہنا کہ میں اس کا روزہ تڑوا دیتا ہوں، تو یہ (نفل) روزے رکھنا شروع کر دیتی ہے جبکہ میں ایک جوان آدمی ہوں اور (اپنی فطری ضرورت پر) صبر نہیں کر پاتا“؛ تو اس دن رسول اللہ صلی اللہ علیہ وسلم نے فرمایا: ”کوئی عورت (نفل) روزہ نہ رکھے مگر اپنے شوہر کی اجازت سے“؛ اور جہاں تک اس کے اس قول کا تعلق ہے کہ میں سورج نکلنے تک نماز نہیں پڑھتا، تو ہم ایسے گھرانے سے ہیں جس کے بارے میں یہ بات معروف ہے (کہ ہم گہری نیند سوتے ہیں) اور سورج نکلنے تک ہماری آنکھ ہی نہیں کھلتی۔ آپ صلی اللہ علیہ وسلم نے فرمایا: ”(صفوان!) جب تم بیدار ہو جایا کرو تو نماز پڑھ لیا کرو۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ الصَّوْمِ/حدیث: 1611]