سیدنا عبد اللہ بن عباس رضی اللہ عنہما سے روایت ہے کہ وہ سخت بیمار ہوئے تو اپنی اولاد کو بلا کر جمع کیا اور فرمایا: میں نے رسول اللہ صلی اللہ علیہ وسلم کو یہ فرماتے ہوئے سنا ہے: ”جو شخص مکہ سے پیدل حج کرے یہاں تک کہ مکہ ہی واپس آ جائے، اللہ تعالیٰ اس کے لیے ہر قدم کے بدلے سات سو نیکیاں لکھتا ہے اور ہر نیکی حرم کی نیکیوں کے برابر ہوتی ہے“، پوچھا گیا: حرم کی نیکیاں کیا ہیں؟ فرمایا: ”ایک نیکی کے بدلے ایک لاکھ نیکیاں۔“
اس حدیث کی سند صحیح ہے، لیکن شیخین نے اسے روایت نہیں کیا۔ [المستدرك على الصحيحين/أَوَّلُ كِتَابِ الْمَنَاسِكِ/حدیث: 1710]

سیدنا عبداللہ بن عمر رضی اللہ عنہما سے روایت ہے کہ رسول اللہ صلی اللہ علیہ وسلم یومِ ترویہ (آٹھ ذوالحجہ) سے ایک دن پہلے لوگوں کو خطبہ ارشاد فرماتے اور انہیں ان کے مناسکِ حج کے متعلق آگاہی دیتے تھے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/أَوَّلُ كِتَابِ الْمَنَاسِكِ/حدیث: 1711]

سیدنا ابن عباس رضی اللہ عنہما سے روایت ہے کہ نبی کریم صلی اللہ علیہ وسلم نے منیٰ میں پانچ نمازیں (ظہر، عصر، مغرب، عشاء اور فجر) ادا فرمائیں۔
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/أَوَّلُ كِتَابِ الْمَنَاسِكِ/حدیث: 1712]

سیدنا عبداللہ بن زبیر رضی اللہ عنہما سے روایت ہے کہ سنتِ حج یہ ہے کہ امام منیٰ میں ظہر، عصر، مغرب، عشاء اور فجر کی نمازیں ادا کرے، پھر عرفہ کی طرف روانہ ہو اور جہاں میسر ہو وہاں دوپہر کو آرام کرے، یہاں تک کہ جب سورج ڈھل جائے تو لوگوں کو خطبہ دے، پھر ظہر اور عصر کی نمازیں ایک ساتھ جمع کر کے پڑھے، پھر غروبِ آفتاب تک عرفات میں وقوف کرے، پھر وہاں سے روانہ ہو کر مزدلفہ میں یا جہاں اللہ مقدر کرے نماز پڑھے، پھر مزدلفہ میں قیام کرے یہاں تک کہ جب پو پھٹ جائے اور خوب روشنی ہو جائے تو طلوعِ آفتاب سے پہلے کوچ کرے، پھر جب جمرہ کبریٰ کی رمی کر لے تو اس کے لیے وہ سب چیزیں حلال ہو جاتی ہیں جو اس پر (احرام کی وجہ سے) حرام تھیں سوائے عورتوں اور خوشبو کے، یہاں تک کہ وہ بیت اللہ کی زیارت (طوافِ افاضہ) کر لے۔
یہ حدیث شیخین کی شرط پر ہے لیکن انہوں نے اسے روایت نہیں کیا۔ [المستدرك على الصحيحين/أَوَّلُ كِتَابِ الْمَنَاسِكِ/حدیث: 1713]