سیدنا عبد الرحمن بن عائش حضرمی رضی اللہ عنہ سے روایت ہے کہ میں نے رسول اللہ صلی اللہ علیہ وسلم کو اللہ عزوجل کا ذکر کرتے ہوئے سنا، آپ صلی اللہ علیہ وسلم نے فرمایا: ”تم یوں کہو: «اللَّهُمَّ إِنِّي أَسْأَلُكَ الطَّيِّبَاتِ، وَتَرْك المُنْكَرَاتِ، وَحُبَّ المَسَاكِينِ، وَأَنْ تَتُوبَ عَلَيَّ وَتَغْفِرَ لِي وَتَرْحَمَنِي، وَإِذَا أَرَدْتَ فِتْنَةً فِي قَوْمٍ فَتَوَفَّنِي غَيْرَ مَفْتُونٍ» ”اے اللہ! میں تجھ سے پاکیزہ چیزوں (نیکیوں)، برائیوں کو چھوڑنے اور مسکینوں کی محبت کا سوال کرتا ہوں، اور یہ کہ تو میری توبہ قبول فرما، مجھے بخش دے اور مجھ پر رحم فرما، اور جب تو کسی قوم کو کسی فتنے میں مبتلا کرنے کا ارادہ کرے تو مجھے فتنے میں پڑے بغیر اپنی طرف اٹھا لے“، پھر رسول اللہ صلی اللہ علیہ وسلم نے فرمایا: ”ان کلمات کو سیکھ لو، اس ذات کی قسم جس کے قبضۂ قدرت میں میری جان ہے، یہ سراسر حق ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا، جبکہ سیدنا معاذ بن جبل رضی اللہ عنہ سے بھی نبی کریم صلی اللہ علیہ وسلم کے واسطے سے ایسی ہی روایت منقول ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1933]

سیدنا معاذ بن جبل رضی اللہ عنہ سے روایت ہے کہ رسول اللہ صلی اللہ علیہ وسلم نے ہمیں صبح کی نماز پڑھانے میں اتنی دیر کر دی کہ قریب تھا کہ سورج طلوع ہو جائے، پھر آپ صلی اللہ علیہ وسلم تشریف لائے اور ہمیں نماز پڑھائی اور اس میں اختصار فرمایا، سلام پھیرنے کے بعد ہماری طرف متوجہ ہوئے اور فرمایا: ”اپنی جگہوں پر بیٹھے رہو، میں تمہیں بتاتا ہوں کہ آج مجھے نماز میں تاخیر کیوں ہوئی، میں نے اس رات حسبِ منشا نماز پڑھی پھر میری آنکھ لگ گئی اور میں سو گیا، میں نے اپنے رب عزوجل کا دیدار کیا، اللہ نے میرے دل میں یہ کلمات ڈالے کہ میں کہوں: «اللَّهُمَّ إِنِّي أَسْأَلُكَ الطَّيِّبَاتِ، وَتَرْك المُنْكَرَاتِ، وَحُبَّ المَسَاكِينِ، وَأَنْ تَتُوبَ عَلَيَّ، وَتَغْفِرَ لِي وَتَرْحَمَنِي، وَإِذَا أَرَدْتَ فِي خَلْقِكَ فِتْنَةً، فَنَجِّنِي إِلَيْكَ مِنْهَا غَيْرَ مَفْتُونٍ، اللَّهُمَّ وَأَسْأَلُكَ حُبَّكَ وَحُبَّ مَنْ يُحِبُّكَ، وَحُبَّ عَمَلٍ يُقَرِّبُنِي إِلَى حُبِّكَ» ”اے اللہ! میں تجھ سے پاکیزہ نیکیوں، منکرات کے ترک اور مسکینوں کی محبت کا سوال کرتا ہوں، اور یہ کہ تو میری توبہ قبول کر، مجھے معاف کر دے اور مجھ پر رحم فرما، اور جب تو اپنی مخلوق میں کوئی فتنہ برپا کرنے کا ارادہ کرے تو مجھے فتنے میں مبتلا کیے بغیر اپنے پاس بلا لے، اے اللہ! میں تجھ سے تیری محبت، اس شخص کی محبت جو تجھ سے محبت کرتا ہو اور ایسے عمل کی محبت کا سوال کرتا ہوں جو مجھے تیری محبت کے قریب کر دے“، پھر آپ صلی اللہ علیہ وسلم ہماری طرف متوجہ ہوئے اور فرمایا: ”انہیں سیکھو اور ان کا درس دیا کرو کیونکہ یہ سراسر برحق ہیں۔“ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1934]