سیدنا ابوہریرہ رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا: جب کچھ لوگ کسی مجلس میں بیٹھیں اور ان میں فضول گوئی زیادہ ہو جائے تو اس مجلس سے اٹھنے سے قبل یہ دعا پڑھ لیں: ” سبحانک اللّٰھمّ ربنا، وبحمدک لا الٰہ الا انت، استغفرک ثم اتوب الیک۔ “ ” تیری ذات پاک ہے اے ہمارے رب! اور تیری حمد کے ساتھ، تیرے سوا کوئی عبادت کے لائق نہیں پھر میں تیری طرف رجوع لاتا ہوں۔ “ تو اس کے اس مجلس کے گناہ بخش دئیے جاتے ہیں۔ ٭٭ یہ اسناد امام مسلم رحمۃ اللہ علیہ کے معیار کے مطابق صحیح ہے تاہم امام بخاری رحمۃ اللہ علیہ نے اس کو وہب کی اس قولی حدیث کے ساتھ معلل کیا ہے جو انہوں نے موسیٰ بن عقبہ کے واسطے سے، پھر سہیل، پھر ان کے والد کے ذریعے کعب الاحبار سے روایت کی ہے۔ (واللہ اعلم) اس حدیث کی شاہد احادیث بھی موجود ہیں جو کہ جبیر بن مطعم، ابوبرزہ اسلمی اور رافع بن خدیج سے مروی ہیں۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1990]

سیدنا جبیر بن مطعم رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا: جو شخص یہ دعا مانگے: سبحان اللہ وبحمدہ، سبحانک اللھم وبحمدک، اشھد ان لا الہ الا انت استغفرک واتوب الیک۔ جو آدمی یہ دعا ذکر اللہ کی مجلس میں پڑھے تو ایسے ہے جیسے ان پر مہر لگ گئی ہو اور جو آدمی یہ دعا لغویات کی مجلس میں پڑھے، اس کے لیے یہ دعا کفارہ ہو گی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ ابوبرزہ اسلمی کی شاہد حدیث یہ ہے: [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 1991]