سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم سے سوال کیا گیا: کون سی دعا سب سے افضل ہے؟ آپ صلی اللہ علیہ وسلم نے فرمایا: ”آدمی کا اپنے نفس (ذات) کے لیے دعا کرنا۔“
اس حدیث کی سند صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 2015]

سیدنا عبداللہ بن مسعود رضی اللہ عنہ سے روایت ہے کہ ایک شخص رسول اللہ صلی اللہ علیہ وسلم کی خدمت میں حاضر ہوا، میرا خیال ہے وہ عوف بن مالک تھے، انہوں نے عرض کیا: اے اللہ کے رسول! فلاں قبیلے والوں نے مجھ پر حملہ کر کے میرا بیٹا اور اونٹ چھین لیے ہیں، رسول اللہ صلی اللہ علیہ وسلم نے فرمایا: ”آلِ محمد ( صلی اللہ علیہ وسلم ) کے (نو) گھروں میں ایک صاع یا ایک مد غلہ تک موجود نہیں، پس تم اللہ عزوجل سے مانگو۔“ وہ شخص اپنی بیوی کے پاس واپس آیا تو اس نے پوچھا کہ رسول اللہ صلی اللہ علیہ وسلم نے کیا جواب دیا؟ انہوں نے اسے سارا حال بتایا، راوی کہتے ہیں کہ ابھی تھوڑی ہی دیر گزری تھی کہ اس کے اونٹ اور بیٹا پہلے سے بھی بہتر حالت میں واپس مل گئے، وہ شخص نبی کریم صلی اللہ علیہ وسلم کے پاس آیا اور آپ کو خبر دی، تو آپ صلی اللہ علیہ وسلم منبر پر تشریف لائے، اللہ کی حمد و ثنا بیان فرمائی اور لوگوں کو اللہ عزوجل سے مانگنے اور اسی کی طرف رغبت کرنے کا حکم دیا اور ان پر یہ آیات تلاوت فرمائیں: ﴿وَمَنْ يَتَّقِ اللَّهَ يَجْعَلْ لَهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ﴾ ”اور جو شخص اللہ سے ڈرتا ہے، اللہ اس کے لیے (مشکلات سے) نکلنے کا راستہ بنا دیتا ہے، اور اسے ایسی جگہ سے رزق عطا فرماتا ہے جہاں سے اسے گمان بھی نہیں ہوتا۔“ [سورة الطلاق: 2، 3]
اس حدیث کی سند صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 2016]