اُمّ المؤمنین سیّدہ عائشہ رضی اللہ عنہا فرماتی ہیں: رسول اللہ صلی اللہ علیہ وسلم سے پوچھا گیا کہ کون سی دعا سب سے افضل ہے؟ تو آپ صلی اللہ علیہ وسلم نے جواباً ارشاد فرمایا: وہ دعا جو انسان خود اپنے لیے مانگتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 2015]

سیدنا عبداللہ رضی اللہ عنہ فرماتے ہیں: ایک شخص رسول اللہ صلی اللہ علیہ وسلم کی بارگاہ میں آیا، میرا خیال ہے کہ وہ سیدنا عوف بن مالک رضی اللہ عنہ تھے۔ انہوں نے عرض کی: یا رسول اللہ صلی اللہ علیہ وسلم ! فلاں قبیلے والوں نے میرے اوپر حملہ کیا اور میرے بچوں اور اونٹوں کو اغواء کر کے لے گئے ہیں تو رسول اللہ صلی اللہ علیہ وسلم نے آلِ محمد اور اہلِ بیت (کی تنگ دستی اور فاقہ مستی) کے احوال بیان فرمائے اور 9 ایسے گھروں کے حالات بیان کیے کہ ان کے پاس ایک صاع طعام یا ایک مد طعام نہ تھا۔ اس لیے اللہ سے سوال کرو، وہ شخص اپنی بیوی کے پاس لوٹ کر گیا، اُس نے پوچھا: رسول اللہ صلی اللہ علیہ وسلم نے کیا جواب دیا؟ اس نے حقیقتِ حال بیان کر دی۔ تو زیادہ وقت نہیں گزرا تھا کہ اللہ تعالیٰ نے پہلے سے بھی زیادہ مال اور اولاد عطا فرما دی، وہ شخص نبی اکرم صلی اللہ علیہ وسلم کی بارگاہ میں حاضر ہوا اور آپ کو صورتِ حال بتائی۔ تو آپ صلی اللہ علیہ وسلم نے منبر پر کھڑے ہو کر اللہ تعالیٰ کی حمد و ثناء کی اور لوگوں کو اللہ تعالیٰ سے مانگنے کا حکم دیا اور اس کی خوب ترغیب دلائی۔ اور یہ آیت تلاوت کی ” ومن یتق اللہ یجعل لہ مخرجاً ویرزقہُ من حیث لا یحتسبُ “ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 2016]