سیدہ صفیہ رضی اللہ عنہا فرماتی ہیں: میرے پاس رسول اللہ صلی اللہ علیہ وسلم تشریف لائے، اس وقت میرے سامنے چار ہزار گٹھلیاں رکھی ہوئی تھیں اور میں اُن پر تسبیح پڑھ رہی تھی، آپ صلی اللہ علیہ وسلم نے پوچھا: اے حیی کی بیٹی! یہ کیا ہے؟ میں نے کہا: میں ان پر تسبیح پڑھ رہی ہوں۔ آپ صلی اللہ علیہ وسلم نے فرمایا: میں جب سے تیرے پاس کھڑا ہوں، اس سے زیادہ تسبیحات پڑھ چکا ہوں۔ میں نے پوچھا یا رسول اللہ صلی اللہ علیہ وسلم ! (وہ تسبیح) مجھے بھی سکھا دیجیے۔ آپ صلی اللہ علیہ وسلم نے فرمایا یہ پڑھا کرو:” سبحان اللہ عدد ما خلق من شیئٍ “ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا، اس حدیث کی ایک شاہد حدیث بھی موجود ہے جو کہ مصری راویوں سے منقول ہے اور اس حدیث کے مقابلے میں زیادہ صحیح ہے۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 2031]

سیدہ عائشہ بنت سعد بن ابی وقاص رضی اللہ عنہ اپنے والد کے متعلق بیان کرتی ہیں کہ وہ رسول اکرم صلی اللہ علیہ وسلم کے ہمراہ ایک خاتون کے پاس گئے اُس کے سامنے گٹھلیاں یا (شاید) کنکریاں پڑی ہوئی تھیں۔ (آپ صلی اللہ علیہ وسلم نے فرمایا: میں تجھے ایسی چیز نہ بتاؤں جو تیرے لیے اس سے زیادہ آسان اور زیادہ ثواب کی حامل ہے۔ یہ پڑھا کرو:” سبحان اللّٰہ عدد ما خلق فی السماء، سبحان اللّٰہ عدد ما خلق فی الارض تُسبِّح “ (یہ تسبیح کیا کرو پھر فرمایا: یوں پڑھو):” سبحان اللّٰہ عدد ما بین ذٰلک، وسبحان اللّٰہ عدد ما ھو خالق۔ “ اور اسی طرح اللہ اکبر اور اسی طرح الحمدللہ اور اسی طرح ولا الٰہ الّا اللہ اور اسی طرح لا قوّۃ الّا باللہ (پڑھا کرو)۔ [المستدرك على الصحيحين/كتاب الدعاء والتكبير والتهليل والتسبيح والذكر/حدیث: 2032]