سیدنا نعمان بن بشیر رضی اللہ عنہ سے مروی ہے کہ نبی اکرم صلی اللہ علیہ وسلم نے ارشاد فرمایا: اللہ تعالیٰ نے زمین اور آسمان کی تخلیق سے دو ہزار سال پہلے کتاب کو رکھ دیا تھا اور ان میں سے سورۂ بقرہ کی آخری دو آیتیں نازل فرمائی ہیں۔ جس گھر میں یہ دو آیات کی تلاوت کی جائیں، تین دن تک شیطان (اس کے اردگرد) دس گھر تک قریب نہیں آتا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ فَضَائِلِ الْقُرْآنِ/حدیث: 2090]

سیدنا ابوذر رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اللہ تعالیٰ نے دو آیتوں پر سورۂ بقرہ ختم کی ہے۔ یہ دونوں آیتیں اللہ نے اپنے تحت العرش خزانے میں سے مجھے عطا فرمائی ہیں۔ ان کو تم (خود بھی) سیکھو اور اپنی عورتوں کو بھی سکھاؤ کیونکہ یہ ” نماز “ ہے اور یہ ” قرآن “ ہے اور یہ ” دعا “ ہے۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ اور اسی حدیث کو عبداللہ بن وھب نے معاویہ بن صالح سے مرسلاً روایت کیا ہے (جیسا کہ درج ذیل ہے) [المستدرك على الصحيحين/كِتَابُ فَضَائِلِ الْقُرْآنِ/حدیث: 2091]

مذکورہ سند کے ہمراہ جبیر بن نفیر رضی اللہ عنہ سے رسول اللہ صلی اللہ علیہ وسلم کا اسی جیسا فرمان منقول ہے۔ ٭٭ امام مسلم رحمۃ اللہ علیہ نے ابومالک اشجعی کے ذریعے ربعی بن حراش کے واسطے سے سیدنا حذیفہ رضی اللہ عنہ سے روایت کی ہے کہ رسول اللہ صلی اللہ علیہ وسلم نے ارشاد فرمایا: سورۂ بقرہ کی آخری آیات مجھے تحت العرش خزانے سے دی گئی ہیں۔ [المستدرك على الصحيحين/كِتَابُ فَضَائِلِ الْقُرْآنِ/حدیث: 2092]