سیدنا علی رضی اللہ عنہ سے روایت ہے کہ نبی کریم صلی اللہ علیہ وسلم کے پاس کچھ قیدی آئے تو آپ صلی اللہ علیہ وسلم نے مجھے دو بھائیوں کو فروخت کرنے کا حکم دیا، میں نے انہیں فروخت کر دیا اور ان کے درمیان جدائی کر دی، پھر میں نے نبی کریم صلی اللہ علیہ وسلم کی بارگاہ میں حاضر ہو کر آپ کو بتایا تو آپ صلی اللہ علیہ وسلم نے فرمایا: ”ان کے پیچھے جاؤ اور انہیں واپس لے کر آؤ، اور ان دونوں کو اکٹھے ہی فروخت کرو، ان کے درمیان ہرگز جدائی نہ کرو۔“
یہ حدیث غریب ہے اور شیخین کی شرط پر صحیح ہے لیکن انہوں نے اسے روایت نہیں کیا، اور ایک قول کے مطابق یہ روایت حکم سے ميمون بن ابی شبيب کے واسطے سے سیدنا علی رضی اللہ عنہ سے مروی ہے اور وہ بھی صحیح ہے: [المستدرك على الصحيحين/كِتَابُ: الْبُيُوعِ/حدیث: 2362]

سیدنا علی بن ابی طالب رضی اللہ عنہ سے روایت ہے کہ انہوں نے ایک لونڈی اور اس کے بچے کو فروخت کیا اور ان کے درمیان جدائی کر دی، تو رسول اللہ صلی اللہ علیہ وسلم نے انہیں اس کام سے منع فرما دیا۔
یہ ایک اور سند کے ساتھ صحیح متن ہے۔ [المستدرك على الصحيحين/كِتَابُ: الْبُيُوعِ/حدیث: 2363]

سیدنا عمران بن حصین رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”وہ شخص ملعون ہے جو (ماں اور بچے کے درمیان) جدائی ڈالے۔“
یہ سند صحیح ہے لیکن شیخین نے اسے روایت نہیں کیا، اور اس کی تشریح سیدنا ابو ایوب انصاری رضی اللہ عنہ کی اس حدیث میں موجود ہے: [المستدرك على الصحيحين/كِتَابُ: الْبُيُوعِ/حدیث: 2364]

سیدنا ابو ایوب انصاری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص ماں اور اس کے بچے کے درمیان جدائی پیدا کرے گا، اللہ تعالیٰ قیامت کے دن اس کے اور اس کے پیاروں کے درمیان جدائی ڈال دے گا۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ: الْبُيُوعِ/حدیث: 2365]