سیدنا عبدالرحمان بن عوف رضی اللہ عنہ کا فرمان ہے: میں امیہ بن خلف اور اس کے بیٹے علی کا ہاتھ پکڑے ان کے درمیان چل رہا تھا، امیہ نے مجھ سے کہا: اے الٰہ کے پجاری تم میں وہ شخص کون ہے جو اپنے سینے پر شتر مرغ کا ” پَر “ بطور نشانی رکھتا ہے۔ (عبدالرحمان) فرماتے ہیں: میں نے جواب دیا: وہ حمزہ بن عبدالمطلب رضی اللہ عنہ ہیں۔ اس نے کہا: یہی وہ شخص ہے جس نے (اس سے پہلے بھی ہمارے ساتھ بہت برا) سلوک کیا ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن اسے صحیحین میں نقل نہیں کیا گیا۔ اور امام ابوبکر بن خزیمہ نے اس حدیث کو جنگ لڑنے والے کے اپنے لیے کوئی مخصوص نشانی رکھنے کی رخصت کے باب میں بیان کیا ہے۔ (نشانی رکھنے کا مقصد یہ ہوتا ہے تاکہ اس کی موجودگی کے مقام کا پتا چل سکے) [المستدرك على الصحيحين/كِتَابُ: الْجِهَادِ/حدیث: 2580]