سیدنا ابن عباس رضی اللہ عنہما فرماتے ہیں: میں نے سیدنا عثمان بن عفان رضی اللہ عنہ سے پوچھا: آپ نے سورۂ انفال اور براۃ کو ایک دوسری کے ساتھ کیوں ملا دیا؟ اور ان کے درمیان ایک سطر بسم اللہ الرحمن الرحیم نہیں لکھی، حالانکہ انفقال ” مثانی “ میں سے ہے اور براۃ ” مئین “ میں سے ہے (مثانی ان سورتوں کو کہتے ہیں جن کی آیات 100 سے کم ہیں اور مئین ان سورتوں کو کہا جاتا ہے جن آیات کی تعداد 100 سے زیادہ ہے، شفیق) اور آپ نے اس کو طوال مفصل میں شامل کیا ہے۔ اس کی وجہ کیا ہے؟ سیدنا عثمان رصی اللہ عنہ نے جواباً فرمایا: رسول اللہ صلی اللہ علیہ وسلم پر ایک وقت میں متعدد سورتوں کا نزول بھی ہوا کرتا تھا چنانچہ جب کوئی آیت نازل ہوتی تو آپ صلی اللہ علیہ وسلم کاتب کو بلوا کر بتا دیا کرتے تھے کہ اس آیت کو فلاں سورۃ میں درج کر دو، جس میں فلاں فلاں مفہوم مذکور ہے۔ کوئی دوسری آیت نازل ہوتی تو آپ اس کے متعلق بھی راہنمائی فرما دیا کرتے تھے کہ اس آیت کو فلاں سورۃ میں درج کر دو جس میں فلاں فلاں ذکر موجود ہے اور سورۂ انفال مدینۃ المنورہ میں ابتدائی ایام میں نازل ہوئی تھی جبکہ سورۃ براۃ نزول قرآن کے بالکل اختتام میں نازل ہوئی ہے اور ان دونوں سورتوں کے مفاہیم بھی ایک دوسری سے ملتے جلتے تھے اور رسول اللہ صلی اللہ علیہ وسلم نے اپنے آخری وقت تک اس بات کی وضاحت نہیں کی تھی کہ ان میں سے کون سی آیت کس سورۃ سے تعلق رکھتی ہے۔ اس لیے میں نے ان دونوں کے درمیان ” بسم اللہ الرحمن الرحیم “ نہیں لکھی اور دونوں کو متصل کر دیا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 2911]