سیدنا عمر رضی اللہ عنہ روایت کرتے ہیں کہ رسول اللہ صلی اللہ علیہ وسلم نے ارشاد فرمایا: جو شخص بالکل اس انداز میں قرآن پڑھنا چاہتا ہے جس طرح نازل ہوا ہے، اس کو چاہیے کہ وہ ” ابن ام معبد رضی اللہ عنہما “ کی قرأت کے مطابق قرآن پاک پڑھے۔ ٭٭ علقمہ رضی اللہ عنہ کی سیدنا عمر رضی اللہ عنہ سے روایت کردہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے مقرر کردہ معیار کے مطابق صحیح الاسناد ہے لیکن انہوں نے اس کو نقل نہیں کیا اور میرا یہ خیال ہے کہ شیخین رحمۃ اللہ علیہما کے نزدیک علقمہ بن قیس رضی اللہ عنہ کا سیدنا عمر رضی اللہ عنہ سے سماع ثابت نہیں ہے۔ واللہ اعلم۔ ٭٭ عمار بن یاسر رضی اللہ عنہ سے مروی درج ذیل حدیث مذکورہ حدیث کی شاہد ہے۔ [المستدرك على الصحيحين/كِتَابُ التَّفْسِيرِ/حدیث: 2930]

سیدنا عمار بن یاسر رضی اللہ عنہ سے روایت ہے کہ رسول اللہ صلی اللہ علیہ وسلم عبداللہ بن مسعود رضی اللہ عنہ کے پاس آئے تو وہ قرآن پاک کی حرف حرف کر کے تلاوت کر رہے تھے (آپ نے ان کی تلاوت سن کر) فرمایا: جو شخص قرآن پاک کی اسی انداز میں تلاوت کرنا چاہے جیسے وہ نازل ہوا ہے تو اس کو چاہیے کہ وہ ابن مسعود رضی اللہ عنہ کی قراءت کے مطابق تلاوت کرے۔ [المستدرك على الصحيحين/كِتَابُ التَّفْسِيرِ/حدیث: 2931]

سیدنا ابومیسرہ عمرو بن شرحبیل رضی اللہ عنہ فرماتے ہیں: ایک آدمی میرے پاس آیا، اس وقت میں نماز پڑھ رہا تھا۔ اس نے کہا: تیری ماں تجھے روئے تم کیسے نماز پڑھ رہے ہو؟ حالانکہ قرآن پاک پڑھنے کے متعلق حکم یہ ہے کہ اس کو خوب عمدگی سے پڑھو۔ آپ فرماتے ہیں: میں نے نماز مختصر کر دی اور (میری عادت تھی کہ) میں نماز کے بعد (تھوڑی دیر) بیٹھا کرتا تھا (لیکن اس دن نہیں بیٹھا بلکہ) گھر میں گیا اور وہاں بھی نہیں بیٹھا، پھر سیڑھیاں چڑھا لیکن بیٹھا نہیں۔ تو میں نے دیکھا کہ، سیدنا حذیفہ رضی اللہ عنہ اور ابن مسعود رضی اللہ عنہ آپس میں گفتگو کر رہے تھے۔ حذیفہ رضی اللہ عنہ نے ابن مسعود رضی اللہ عنہ سے کہا: ان کو یہ مصحف دے دو، انہوں نے جواباً کہا: خدا کی قسم! میں یہ مصحف ہرگز ان کو نہیں دوں گا۔ مجھے رسول اللہ صلی اللہ علیہ وسلم نے ستر سے زائد سورتیں پڑھائی ہیں۔ پھر میں یہ مصحف ان کو دے دوں خدا کی قسم میں یہ مصحف ان کے حوالے ہرگز نہیں کروں گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 2932]

سیدنا عبداللہ بن مسعود رضی اللہ عنہ فرماتے ہیں: میں نے رسول اللہ صلی اللہ علیہ وسلم کی زبان سے ستر سورتیں سیکھی ہیں (ان دنوں) زید بن ثابت رضی اللہ عنہ چھوٹا بچہ ہوتا تھا، بچوں کے ہمراہ کھیلا کرتا تھا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ عبداللہ سے مروی ایک حدیث اس حدیث کی زیادتی کی شاہد ہے (جو کہ درج ذیل ہے) [المستدرك على الصحيحين/كِتَابُ التَّفْسِيرِ/حدیث: 2933]

سیدنا عبداللہ بن مسعود رضی اللہ عنہ فرماتے ہیں: مجھے رسول اللہ صلی اللہ علیہ وسلم نے ستر سورتیں سکھائی ہیں، میں نے وہ تمام زید بن ثابت رضی اللہ عنہ کے اسلام لانے سے بھی پہلے یاد کر لی تھیں۔ [المستدرك على الصحيحين/كِتَابُ التَّفْسِيرِ/حدیث: 2934]