سیدنا عبداللہ بن سلام رضی اللہ عنہ فرماتے ہیں: نبی اکرم صلی اللہ علیہ وسلم کے صحابہ کرام رضوان اللہ علیہم اجمعین بیٹھے آپس میں باتیں کر رہے تھے کہ اگر ہمیں یہ پتہ چل جائے کہ کون سا عمل اللہ تعالیٰ کی بارگاہ میں سب سے زیادہ پسندیدہ ہے تو ہم اس کو اپنا لیں۔ تب اللہ تعالیٰ نے یہ آیات نازل فرمائیں: (سَبَّحَ لِلّٰہِ مَا فِی السَّمٰوٰتِ وَ مَا فِی الْاَرْضِج وَ ہُوَ الْعَزِیْزُ الْحَکِیْمُ یٰٓاَیُّھَا الَّذِیْنَ ٰامَنُوْا لِمَ تَقُوْلُوْنَ مَا لَا تَفْعَلُوْنَ کَبُرَ مَقْتًا عِنْدَ اللّٰہِ اَنْ تَقُوْلُوْا مَا لَا تَفْعَلُوْنَ اِنَّ اللّٰہَ یُحِبُّ الَّذِیْنَ یُقَاتِلُوْنَ فِیْ سَبِیْلِہٖ صَفًّا کَاَنَّہُمْ بُنیَانٌ مَّرْصُوصٌ) ” اللہ کی پاکی بولتا ہے جو کچھ آسمان میں ہے اور جو کچھ زمین میں ہے اور وہی عزت و حکمت والا ہے۔ اے ایمان والو کیوں کہتے وہ جو نہیں کرتے۔ کتنی سخت ناپسند ہے اللہ کو وہ بات وہ کہو جو نہ کرو۔ بے شک اللہ دوست رکھتا ہے انہیں جو اس کی راہ میں لڑتے ہیں پرا باندھ کر گویا وہ عمارت ہیں رانگا پلائی “۔ سورۃ کے آخر تک اور رسول اللہ صلی اللہ علیہ وسلم نے ہمیں یہ آیات سنائیں۔ ٭٭ محمد بن کثیر رحمۃ اللہ علیہ کی روایت میں یہ اضافہ ہے، اوزاعی کہتے ہیں: یحیی بن کثیر نے یہ سورۃ آخر تک اسی طرح ہمارے سامنے تلاوت کی۔ ابراہیم نے کہا: ہمارے سامنے محمد بن کثیر نے سورۃ کے آخر تک تلاوت کی۔ ابوعمرو بن سماک کہتے ہیں: ابراہیم نے یہ سورۃ آخر تک اسی طرح ہمارے سامنے تلاوت کی۔ امام حاکم کہتے ہیں: ابوعمرو بن سماک نے یہ سورۃ آخر تک اسی طرح ہمارے سامنے تلاوت کی۔ (راوی کتاب کہتے ہیں:) امام حاکم نے یہ سورۃ آخر تک اسی طرح ہمارے سامنے تلاوت کی۔ یہ حدیث شیخین کی شرط کے مطابق صحیح ہے تاہم ان دونوں حضرات نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 2935]