سیدنا ابن عباس رضی اللہ عنہما فرماتے ہیں: تم کون سی قراءت کو آخری قراءت سمجھتے ہو؟ لوگوں نے کہا: زید رضی اللہ عنہ کی قراءت کو، آپ نے فرمایا: نہیں۔ رسول اللہ صلی اللہ علیہ وسلم ہر سال جبریل علیہ السلام کو قرآن سنایا کرتے تھے لیکن جس سال آپ کا وصال مبارک ہوا، اس سال آپ نے دو مرتبہ جبریل علیہ السلام کو قرآن سنایا اور ان میں عبداللہ بن مسعود رضی اللہ عنہ کی قراءت سب سے آخری قراءت تھی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے ان الفاظ کے ہمراہ نقل نہیں کیا۔ اور اس حدیث کا فائدہ یہ ہے کہ اس میں عبداللہ بن مسعود رضی اللہ عنہ کا ذکر موجود ہے۔ [المستدرك على الصحيحين/كِتَابُ التَّفْسِيرِ/حدیث: 2939]

سیدنا سمرہ رضی اللہ عنہ فرماتے ہیں: رسول اللہ صلی اللہ علیہ وسلم پر کئی مرتبہ قرآن پیش کیا گیا اور ہماری یہ قراءت آخری مرتبہ والی ہے۔ ٭٭ اس حدیث کا کچھ حصہ امام بخاری رحمۃ اللہ علیہ کے معیار کے مطابق اور کچھ حصہ امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 2940]