سیدنا اسماعیل بن عبداللہ بن قسطنطین رحمۃ اللہ علیہ فرماتے ہیں: میں نے شبل رحمۃ اللہ علیہ سے قرآن پاک پڑھا۔ شبل رحمۃ اللہ علیہ کہتے ہیں: انہوں نے عبیداللہ بن کثیر رحمۃ اللہ علیہ سے قرآن پڑھا۔ وہ کہتے ہیں: انہوں نے مجاہد رحمۃ اللہ علیہ سے پڑھا۔ مجاہد کہتے ہیں: انہوں نے ابن عباس رضی اللہ عنہما سے پڑھا۔ ابن عباس رضی اللہ عنہما کہتے ہیں: انہوں نے ابی بن کعب رضی اللہ عنہ سے پڑھا اور ابن عباس رضی اللہ عنہما کہتے ہیں: سیدنا ابی بن کعب رضی اللہ عنہ نے نبی اکرم صلی اللہ علیہ وسلم سے پڑھا۔ امام شافعی رحمۃ اللہ علیہ کہتے ہیں: میں نے اسماعیل بن قسطنطین رحمۃ اللہ علیہ سے پڑھا اور وہ کہا کرتے تھے قرآن ” اسم “ ہے، مہموز نہیں ہے۔ یہ ” قراءت “ سے ماخوذ نہیں ہے کیونکہ اگر یہ قراءت سے ماخوذ ہوتا تو جب بھی پڑھا جاتا تو قرآن ہوتا، اس لیے یہ قرآن کا ” اسم “ ہے جیسا کہ توراۃ اور انجیل قراءت مہموز ہے لیکن قرآن مہموز نہیں ہے۔ [المستدرك على الصحيحين/كِتَابُ التَّفْسِيرِ/حدیث: 2941]

سیدنا ابوذر رضی اللہ عنہ فرماتے ہیں: ایک دیہاتی رسول اللہ صلی اللہ علیہ وسلم کی خدمت میں آیا اور بولا:” یا نبیئی اللّٰہ “ (آخر میں ہمزہ بولا) رسول اللہ صلی اللہ علیہ وسلم نے اسے کہا: میں ” نبیئی اللّٰہ “ نہیں ہوں بلکہ میں ” نبی اللّٰہ “ ہوں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ درج ذیل حدیث مذکورہ حدیث کی مفسر شاہد ہے لیکن اس کی سند ہماری اس کتاب کے معیار کے مطابق نہیں ہے۔ [المستدرك على الصحيحين/كِتَابُ التَّفْسِيرِ/حدیث: 2942]

سیدنا ابن عمر رضی اللہ عنہما فرماتے ہیں: نہ تو رسول اللہ صلی اللہ علیہ وسلم نے (قرآن کو) ہمزہ کے ساتھ پڑھا اور نہ آپ کے بعد آپ کے خلفاء سیدنا ابوبکر رضی اللہ عنہ اور سیدنا عمر رضی اللہ عنہ نے پڑھا ہے۔ ہمزہ پڑھنا تو بدعت ہے جو لوگوں نے خلفاء راشدین رضی اللہ عنہم کے بعد ایجاد کی ہے۔ احمد بن حنبل رحمۃ اللہ علیہ فرماتے ہیں: میں موسیٰ بن عبیدہ الربذی رحمۃ اللہ علیہ اور عبدالرحمن بن زیادہ الافریقی رحمۃ اللہ علیہ کی روایات نقل نہیں کرتا۔ [المستدرك على الصحيحين/كِتَابُ التَّفْسِيرِ/حدیث: 2943]

یحییٰ بن محمد بن یحییٰ بیان کرتے ہیں کہ میں نے احمد بن حنبل کو یہ فرماتے ہوئے سنا: ”میں نہ تو موسیٰ بن عبیدہ الربذی کی حدیث لکھتا ہوں اور نہ ہی عبدالرحمن بن زیاد الافریقی کی حدیث (لکھتا ہوں)“۔ [المستدرك على الصحيحين/كِتَابُ التَّفْسِيرِ/حدیث: 2943M]

سیدنا زید بن ثابت رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: قرآن کریم تفخیم کے ساتھ نازل ہوا ہے، جیسا کہ سورت مائدہ کی آیت نمبر 110 (کَھَیْئَۃِ الطَّیْر)، سورت مرسلات کی آیت نمبر 6 (عُذْرًا وَ نُذْرًا)، سورت کہف کی آیت نمبر 96 (وَالصَّدَفَیْن) اور سورت اعراف کی آیت نمبر 54 (وَاَلا لَہُ الْخَلْقُ وَالاَمْرُ) اور اس طرح کی دیگر آیات میں ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 2944]