سیدنا ابی بن کعب رضی اللہ عنہ فرماتے ہیں: رسول اللہ صلی اللہ علیہ وسلم نے فرمایا: کیا میں تجھے ایک ایسی صورت کی تعلیم نہ دوں جس کی مثل نہ توراۃ، زبور اور انجیل میں ہے اور نہ ہی قرآن کریم میں اس جیسی کوئی دوسری سورت موجود ہے۔ میں نے کہا: جی ہاں۔ آپ صلی اللہ علیہ وسلم نے فرمایا: میں چاہتا ہوں کہ اس دروازے سے نکلنے سے پہلے پہلے تم یہ سورت سیکھ لو۔ پھر رسول اللہ صلی اللہ علیہ وسلم اٹھ کر کھڑے ہوئے اور میں بھی آپ کے ساتھ کھڑا ہو گیا۔ پھر آپ صلی اللہ علیہ وسلم نے میرا ہاتھ پکڑا اور میرے ساتھ باتیں کرتے ہوئے باہر کی طرف چل پڑے۔ میں بہت آہستہ آہستہ قدم اٹھا رہا تھا کیونکہ میں نہیں چاہتا تھا کہ وہ سورۃ سیکھے بغیر میں دروازے سے باہر نکلوں۔ جب میں دروازے کے قریب پہنچا تو میں نے عرض کی: یا رسول اللہ صلی اللہ علیہ وسلم ! (آپ مجھے) وہ سورۃ (تو سکھا دیجیے) جس کا آپ نے مجھ سے وعدہ کیا ہے۔ آپ صلی اللہ علیہ وسلم نے فرمایا: جب تم نماز کے لیے کھڑے ہوتے ہو تو کیا پڑھتے ہو؟ میں نے سورۂ فاتحہ پڑھ کر سنا دی۔ آپ صلی اللہ علیہ وسلم نے فرمایا: یہی ہے، یہی ہے۔ اور یہ ” سبع مثانی “ اور قرآن عظیم ہے جو کہ مجھے دیا گیا ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ اس حدیث کو مالک بن انس نے علاء بن عبدالرحمن کے حوالے سے ایک دوسری سند کے ہمراہ بھی نقل کیا ہے (جیسا کہ درج ذیل ہے) [المستدرك على الصحيحين/كِتَابُ التَّفْسِيرِ/حدیث: 3056]

مذکورہ سند کے ہمراہ سیدنا ابی بن کعب رضی اللہ عنہ نے رسول اللہ صلی اللہ علیہ وسلم کا ایسا ہی ارشاد نقل کیا ہے۔ [المستدرك على الصحيحين/كِتَابُ التَّفْسِيرِ/حدیث: 3057]

سیدنا ابن عباس رضی اللہ عنہما نے اللہ تعالیٰ کے ارشاد ” اَلْحَمْدُلِلّٰہِ رَبِّ الْعَالَمِیْنَ “ (الفاتحہ: 1) کے متعلق فرمایا: (العالمین سے مراد) جنات اور انسان ہیں۔ امام حاکم رحمۃ اللہ علیہ کہتے ہیں: تاکہ اس علم کا طالب یہ سمجھ لے کہ جس صحابی نے وحی اور نزول قرآن کا زمانہ پایا ہو اس کی تفسیر شیخین رحمۃ اللہ علیہما کے نزدیک مسند حدیث (کا درجہ رکھتی) ہے۔ [المستدرك على الصحيحين/كِتَابُ التَّفْسِيرِ/حدیث: 3058]

سیدنا عبداللہ بن مسعود رضی اللہ عنہ اور کچھ دیگر صحابہ کرام رضوان اللہ علیہم اجمعین سے منقول ہے کہ: ” مَلِکِ یَوْمِ الدِّیْنِ “ (الفاتحۃ: 3) ” روز جزاء کا مالک “ (میں یَوْمِ الدِّیْن سے) مراد حساب کتاب کا دن ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3059]

سیدنا عبداللہ رضی اللہ عنہ نے اللہ تعالیٰ کے قول:” الصِّرَاطَ الْمُسْتَقِیْمَ “ (الفاتحۃ: 6) کے متعلق فرمایا: اس سے مراد ” کتاب اللہ “ ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3060]