اسلم ابو عمران مولی بنو تجیب سے روایت ہے، انہوں نے کہا: ہم قسطنطنیہ میں تھے، اہل مصر پر عقبہ بن عامر جہنی اور اہل شام پر فضالہ بن عبید انصاری رضی اللہ عنہما امیر تھے، رومیوں کا ایک عظیم لشکر نکلا تو ہم مسلمانوں نے بھی ان کے مقابلے میں ایک عظیم صف بنائی، پھر مسلمانوں میں سے ایک شخص نے رومیوں کی صف پر حملہ کر دیا یہاں تک کہ وہ ان کے اندر گھس گیا، پھر وہ ہماری طرف پلٹ کر آیا تو لوگوں نے شور مچایا اور کہا: ”اس نے اپنے ہاتھوں خود کو ہلاکت میں ڈال دیا“، اس پر رسول اللہ صلی اللہ علیہ وسلم کے جلیل القدر صحابی سیدنا ابو ایوب انصاری رضی اللہ عنہ نے فرمایا: ”اے لوگو! تم اس آیت کی یہ تاویل کر رہے ہو حالانکہ یہ آیت ہم انصار کے بارے میں نازل ہوئی تھی، جب اللہ نے اپنے دین کو غلبہ عطا فرمایا اور اس کے مددگار کثیر ہو گئے تو ہم نے رسول اللہ صلی اللہ علیہ وسلم سے پوشیدہ طور پر آپس میں ایک دوسرے سے کہا کہ ہمارے اموال ضائع ہو چکے ہیں، کاش کہ ہم اب ان میں قیام کریں اور ان کی اصلاح (کاشت کاری و دیکھ بھال) کریں، تو اللہ تعالیٰ نے ہماری اس بات کا رد نازل فرمایا جس کا ہم نے ارادہ کیا تھا، پس اللہ عزوجل نے یہ آیت نازل فرمائی: ﴿وَأَنْفِقُوا فِي سَبِيلِ اللَّهِ وَلَا تُلْقُوا بِأَيْدِيكُمْ إِلَى التَّهْلُكَةِ﴾ ”اور اللہ کی راہ میں خرچ کرو اور اپنے ہاتھوں خود کو ہلاکت میں نہ ڈالو۔“ [سورة البقرة: 195] ، چنانچہ ہلاکت سے مراد ان اموال کی دیکھ بھال کے لیے (جہاد چھوڑ کر) بیٹھ رہنا تھا جس کا ہم نے ارادہ کیا تھا، پس ہمیں جہاد کا حکم دیا گیا۔“ پھر سیدنا ابو ایوب رضی اللہ عنہ ہمیشہ اللہ کی راہ میں جہاد کرتے رہے یہاں تک کہ اللہ عزوجل نے ان کی روح قبض فرما لی۔
یہ حدیث امام بخاری اور امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3125]

سیدنا براء بن عازب رضی اللہ عنہ سے روایت ہے کہ ایک شخص نے ان سے پوچھا: اے ابوعمارہ! کیا اللہ تعالیٰ کے اس فرمان ﴿وَلَا تُلْقُوا بِأَيْدِيكُمْ إِلَى التَّهْلُكَةِ﴾ [سورة البقرة: 195] سے مراد وہ شخص ہے جو دشمن کے لشکر سے ٹکراتا ہے اور لڑتے لڑتے شہید ہو جاتا ہے؟ انہوں نے جواب دیا: ”نہیں، بلکہ اس سے مراد وہ شخص ہے جو کوئی گناہ کر بیٹھے اور پھر (مایوس ہو کر) کہے کہ اللہ اب مجھے کبھی معاف نہیں کرے گا۔“
یہ حدیث امام بخاری اور امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3126]

عبداللہ بن سلمہ سے روایت ہے کہ سیدنا علی بن ابی طالب رضی اللہ عنہ سے اللہ عزوجل کے اس فرمان ﴿وَأَتِمُّوا الْحَجَّ وَالْعُمْرَةَ لِلَّهِ﴾ ”اور اللہ کے لیے حج اور عمرہ کو پورا کرو۔“ [سورة البقرة: 196] کے متعلق سوال کیا گیا تو انہوں نے فرمایا: ”اس کا مطلب یہ ہے کہ تم اپنے گھر کی بستی ہی سے احرام باندھو۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3127]

سیدنا ابی بن کعب رضی اللہ عنہ سے روایت ہے کہ وہ اس آیت کی قراءت یوں کرتے تھے: «فَمَنْ لَمْ يَجِدْ فَصِيَامُ ثَلَاثَةِ أَيَّامٍ مُتَتَابِعَاتٍ» ”پھر جس کو (کفارہ ادا کرنے کی) مقدرت نہ ہو تو وہ تین دن کے مسلسل روزے رکھے۔“ [البقرة: 196]
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3128]