سیدہ عائشہ رضی اللہ عنہ فرماتی ہیں: (لوگوں کی یہ عادت تھی کہ) کوئی آدمی اپنی بیوی کو جتنی چاہتا طلاقیں دے دیتا حتیٰ کہ 100 سے بھی زیادہ طلاقیں دے دیتا اور عدت ختم ہونے سے پہلے رجوع کر لیتا، یہاں تک کہ ایک آدمی نے اپنی بیوی سے کہا: خدا کی قسم! نہ تو میں تجھے طلاق دوں گا کہ تو مجھ سے جدا ہو سکے اور نہ ہی میں تجھے اپنی بیوی کے طور پر رکھوں گا۔ اس نے پوچھا: وہ کیسے؟ اس نے کہا: میں تجھے طلاق دوں گا اور جب تیری عدت گزرنے کا وقت قریب ہو گا میں تیرے ساتھ رجوع کر لوں گا، پھر طلاق دوں گا اور ایسا ہی کرتا رہوں گا۔ اس عورت نے سیدہ عائشہ رضی اللہ عنہا کی خدمت میں یہ شکایت کی، ام المومنین نے اس بات کا تذکرہ رسول اکرم صلی اللہ علیہ وسلم کی بارگاہ میں کیا تو رسول پاک صلی اللہ علیہ وسلم نے کوئی جواب نہیں دیا بلکہ آپ خاموش رہے، حتیٰ کہ قرآن پاک کی یہ آیت نازل ہو گئی: اَلطَّلَاقُ مَرَّتٰنِ فَاِمْسَاکٌم بِمَعْرُوْفٍ اَوْ تَسْرِیْحٌ بِاِحْسَانٍ (البقرۃ: 229) ” یہ طلاق دو بار تک ہے پھر بھلائی کے ساتھ روک لینا ہے یا نکوئی کے ساتھ چھوڑ دینا ہے “۔ ٭٭ یہ حدیث صحیح الاسناد ہے اور کسی محدث نے یعقوب بن حمید کے متعلق دلیل کے ساتھ اعتراض نہیں کیا اور میرے ساتھ میرے شیخ ابواحمد الحافظ کا مناظرہ ہوا اور انہوں نے یہ موقف اختیار کیا کہ امام بخاری رحمۃ اللہ علیہ نے اپنی صحیح میں ان کی روایات نقل کی ہیں۔ میں نے کہا: وہ تو یعقوب بن محمدالزہری ہیں اور وہ ثبت ہیں اور ان کی روایات کا ہم انکار نہیں کرتے۔ [المستدرك على الصحيحين/كِتَابُ التَّفْسِيرِ/حدیث: 3143]

سیدنا معقل بن یسار رضی اللہ عنہ فرماتے ہیں: ان کی بہن کو ان کے شوہر نے طلاق دے دی اور پھر رجوع کا ارادہ کیا تو معقل نے اس کو رجوع سے منع کر دیا تو اللہ تبارک و تعالیٰ نے یہ آیت نازل ہوئی: وَ اِذَا طَلَّقْتُمُ النِّسَآئَ فَبَلَغْنَ اَجَلَھُنَّ فَلَا تَعْضُلُوْھُنَّ اَنْ یَّنْکِحْنَ اَزْوَاجَھُنَّ اِذَا تَرَاضَوْا بَیْنَھُمْ بِالْمَعْرُوْفِ) (البقرۃ: 232) ” اور جب تم عورتوں کو طلاق دو اور ان کی معیاد پوری ہو جائے تو اے عورتوں کے والیو انہیں نہ روکو اس سے کہ اپنے شوہروں سے نکاح کر لیں جب کہ آپس میں موافق شرح رضامند ہو جائیں “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3144]