سیدنا (عبداللہ) بن عباس رضی اللہ عنہما سے روایت ہے ” سیدنا یعقوب عرق النساء (بیماری) میں مبتلا ہوئے تو انہوں نے یہ نذر مانی کہ اگر اللہ تعالیٰ ان کو اس بیماری سے شفاء دے دے تو وہ کبھی بھی ایسا گوشت نہیں کھائیں گے جس میں رگیں ہوتی ہیں (سیدنا ابن عباس رضی اللہ عنہما) فرماتے ہیں، یہودیوں نے بھی اس طرح کا گوشت اپنے اوپر حرام کر لیا تو اللہ تعالیٰ نے یہ آیت نازل فرمائی: کُلُّ الطَّعَامِ کَانَ حِلًّا لِّبَنِیْٓ اِسْرَآئِیْلَ اِلَّا مَا حَرَّمَ اِسْرَآئِیْلُ عَلٰی نَفْسِہٖ مِنْ قَبْلِ اَنْ تُنَزَّلَ التَّوْرٰۃُ قُلْ فَاْتُوْا بِالتَّوْرٰۃِ فَاتْلُوْھَآ اِنْ کُنْتُمْ صٰدِقِیْنَ (آل عمران: 93) ” سب کھانے بنی اسرائیل کو حلال تھے مگر وہ جو یعقوب علیہ السلام نے اپنے اوپر حرام کر لیا تھا تورات اترنے سے پہلے تم فرماؤ تورات لا کر پڑھو اگر سچے ہو “۔ یہ بات نزول تورات سے پہلے کی ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3190]

سیدنا انس بن مالک رضی اللہ عنہ فرماتے ہیں: رسول اللہ صلی اللہ علیہ وسلم ” عرق النساء “ (بیماری کے علاج) کے متعلق ارشاد فرمایا: کسی عربی دنبے کی چکی لیں جو نہ بہت زیادہ بڑی اور نہ زیادہ چھوٹی ہو، اس کے چھوٹے چھوٹے ٹکڑے کریں پھر اس کو خوب پگھلائیں اور اس کے تین حصے کر لیں ہر حصہ روزانہ صبح نہار منہ پئیں۔ (نوٹ: سیدنا انس بن سیرین رضی اللہ عنہ کا کہنا ہے کہ میں نے یہ نسخہ بہت لوگوں کو بتایا اللہ تعالیٰ کے فضل سے سب لوگ شفایاب ہوئے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3191]