ابوسعید مولیٰ ابواُسید انصاری سے روایت ہے، انہوں نے کہا کہ سیدنا عثمان بن عفان رضی اللہ عنہ نے سنا کہ اہلِ مصر کا وفد آ رہا ہے تو آپ ان کے استقبال کے لیے نکلے، جب انہوں نے آپ کے بارے میں سنا تو وہ آپ کی طرف بڑھے، راوی کہتے ہیں کہ سیدنا عثمان رضی اللہ عنہ کو یہ پسند نہ تھا کہ وہ مدینہ میں داخل ہوں، چنانچہ جب وہ آپ کے پاس پہنچے تو انہوں نے کہا: قرآن مجید منگوائیے اور ”ساتویں“ (سورت) نکالیے —وہ سورت یونس کو ساتویں کہتے تھے— پس آپ نے اسے پڑھا یہاں تک کہ اس آیت پر پہنچے: ﴿قُلْ أَرَأَيْتُمْ مَا أَنْزَلَ اللَّهُ لَكُمْ مِنْ رِزْقٍ فَجَعَلْتُمْ مِنْهُ حَرَامًا وَحَلَالًا قُلْ آللَّهُ أَذِنَ لَكُمْ أَمْ عَلَى اللَّهِ تَفْتَرُونَ﴾ [سورة يونس: 59] ”آپ فرما دیجیے: بھلا تم نے دیکھا جو رزق اللہ نے تمہارے لیے نازل فرمایا پھر تم نے خود ہی اس میں سے کچھ حرام اور کچھ حلال ٹھہرا لیا، کہیے: کیا اللہ نے تمہیں اس کی اجازت دی ہے یا تم اللہ پر جھوٹ باندھ رہے ہو؟“ اس پر انہوں نے کہا: ٹھہریے! آپ نے چراگاہوں کو جو مخصوص کیا ہے، اس کے بارے میں بتائیے کہ کیا اللہ نے آپ کو اس کی اجازت دی ہے یا آپ اللہ پر بہتان باندھ رہے ہیں؟ آپ رضی اللہ عنہ نے فرمایا: آگے پڑھو، یہ آیت تو فلاں فلاں معاملے میں نازل ہوئی تھی، رہی بات چراگاہوں کی تو مجھ سے پہلے سیدنا عمر رضی اللہ عنہ نے صدقے کے اونٹوں کے لیے چراگاہیں مخصوص کی تھیں، پھر جب میں خلیفہ بنا اور صدقے کے اونٹوں کی تعداد بڑھ گئی تو میں نے صدقے کی زیادتی کی وجہ سے چراگاہ کے رقبے میں بھی اضافہ کر دیا“۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3339]

نافع رحمہ اللہ سے روایت ہے کہ حجاج نے خطبہ لمبا کر دیا تو سیدنا ابن عمر رضی اللہ عنہما نے اپنا سر میری گود میں رکھ لیا، حجاج نے دورانِ خطبہ کہا: ابن زبیر نے اللہ کی کتاب بدل دی ہے، یہ سن کر سیدنا ابن عمر رضی اللہ عنہما اٹھ کر بیٹھ گئے اور فرمایا: نہ تم ایسی طاقت رکھتے ہو اور نہ ہی ابن زبیر، کیونکہ اللہ کا فرمان ہے: ﴿لَا تَبْدِيلَ لِكَلِمَاتِ اللَّهِ﴾ [سورة يونس: 64] ”اللہ کی باتوں میں کوئی تبدیلی نہیں ہو سکتی“، اس پر حجاج نے کہا: بیشک آپ کو ایسا علم دیا گیا ہے جو شاید آپ کو نفع دے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3340]