سیدنا ابی بن کعب رضی اللہ عنہ کا بیان ہے کہ غزوۂ احد میں 64 انصاری اور 6 مہاجر صحابی شہید ہوئے۔ ان میں سے کچھ صحابہ کے چہروں کی بے حرمتی کی گئی، ان میں سیدنا حمزہ رضی اللہ عنہ بھی تھے۔ انصاری صحابہ نے کہا: اگر کسی دن یہ ہمارے قابو آ گئے تو ہم ان سے اس سے بھی سخت بدلہ لیں گے۔ تو جب مکہ فتح ہوا تو اللہ تعالیٰ نے یہ آیت نازل فرمائی: وَ اِنْ عَاقَبْتُمْ فَعَاقِبُوْا بِمِثْلِ مَا عُوْقِبْتُمْ بِہٖ وَ لَئِنْ صَبَرْتُمْ لَھُوَ خَیْرٌ لِّلصّٰبِرِیْنَ (النحل: 126) ” اور اگر تم سزا دو تو ایسی ہی سزا دو جیسی تمہیں تکلیف پہنچائی تھی اور اگر تم صبر کرو تو بے شک صبر والوں کو صبر اچھا ہے “۔ تو ایک آدمی نے کہا: آج کے بعد کوئی قریشی نہیں رہے گا: تو رسول اللہ صلی اللہ علیہ وسلم نے فرمایا: 4 آدمیوں کے سوا باقی قوم سے ہاتھ روک لو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3408]