سیدنا جعفر (صادق) بن محمد (جعفر صادق بن محمد بن علی بن حسین رضی اللہ عنہ) اپنے والد (محمد) سے بیان کرتے ہیں کہ ہم سیدنا جابر بن عبداللہ رضی اللہ عنہ کے ہاں گئے۔ جب ہم آپ کے پاس پہنچے تو انہوں نے سب لوگوں سے پوچھا (شناسائی حاصل کی) حتیٰ کہ میری باری آئی تو میں نے بتایا کہ ”میں محمد بن علی بن حسین ہوں۔“ تو انہوں نے اپنا ہاتھ میرے سر کی طرف بڑھایا، پھر میرا اوپر والا بٹن کھولا، پھر نیچے والا کھولا، پھر اپنا ہاتھ میری چھاتیوں کے درمیان رکھا، اور میں ان دنوں جوان لڑکا تھا۔ انہوں نے کہا: ”خوش آمدید، بھتیجے! اپنے ہی گھر میں آئے ہو! جو جی چاہتا ہے پوچھ لو۔“ چنانچہ میں نے ان سے پوچھا جبکہ وہ نابینا ہو چکے تھے۔ اور نماز کا وقت ہو گیا تو وہ اپنے اسی چھوٹے سے کپڑے ہی کو لپیٹ کر کھڑے ہو گئے۔ اسے دہرا کر کے سیا گیا تھا۔ کپڑا اس قدر چھوٹا تھا کہ اسے جب بھی کندھے پر رکھتے، اس کے کنارے گر پڑتے تھے، انہوں نے ہم کو نماز پڑھائی حالانکہ آپ کی بڑی چادر آپ کے پہلو میں کھونٹی پر لگی ہوئی تھی۔ میں نے کہا: ”آپ مجھے رسول اللہ صلی اللہ علیہ وسلم کے حج کے بارے میں بیان فرمائیں“، تو انہوں نے اپنے ہاتھ سے نو کی گرہ بنائی پھر کہا کہ ”رسول اللہ صلی اللہ علیہ وسلم نو سال تک رکے رہے اور حج نہیں کیا، پھر دسویں سال لوگوں میں اعلان کیا کہ اللہ کے رسول صلی اللہ علیہ وسلم حج کے لیے جانے والے ہیں، چنانچہ مدینہ میں بہت زیادہ لوگ آ گئے۔ ہر ایک اللہ کے رسول صلی اللہ علیہ وسلم کی اقتداء اور آپ کے عمل کی پیروی کرنا چاہتا تھا۔ چنانچہ رسول اللہ صلی اللہ علیہ وسلم نکلے تو ہم بھی آپ صلی اللہ علیہ وسلم کے ساتھ تھے حتیٰ کہ مقام ذوالحلیفہ پر پہنچ گئے۔ یہاں اسماء بنت عمیس (زوجہ ابوبکر رضی اللہ عنہ) نے محمد بن ابی بکر رضی اللہ عنہ کو جنم دیا۔ پس انہوں نے رسول اللہ صلی اللہ علیہ وسلم کی طرف پیغام بھیجا کہ میں کیسے کروں؟ آپ صلی اللہ علیہ وسلم نے فرمایا: ”غسل کرو، کپڑے کا لنگوٹ باندھو اور احرام کی نیت کر لو۔“ پھر رسول اللہ صلی اللہ علیہ وسلم نے مسجد میں نماز پڑھی، پھر (اپنی اونٹنی) قصواء پر سوار ہو گئے حتیٰ کہ وہ آپ صلی اللہ علیہ وسلم کو لے بیداء (میدان) کے سامنے کھڑی ہو گئی۔ جابر رضی اللہ عنہ بیان کرتے ہیں: میں نے دیکھا تاحد نگاہ آپ صلی اللہ علیہ وسلم کے سامنے، دائیں، بائیں اور پیچھے لوگ ہی لوگ تھے۔ کچھ سوار اور کچھ پیدل۔ اور رسول اللہ صلی اللہ علیہ وسلم ہمارے درمیان میں تھے، آپ صلی اللہ علیہ وسلم پر قرآن اتر رہا تھا اور آپ صلی اللہ علیہ وسلم اس کا معنی و مفہوم اور طریقہ عمل بھی خوب جانتے تھے چنانچہ جو آپ صلی اللہ علیہ وسلم نے کیا ہم نے بھی ویسے ہی کیا۔ رسول اللہ صلی اللہ علیہ وسلم نے کلمہ توحید پکارا: «لَبَّيْكَ اللَّهُمَّ لَبَّيْكَ، لَبَّيْكَ لَا شَرِيكَ لَكَ لَبَّيْكَ، إِنَّ الْحَمْدَ وَالنِّعْمَةَ لَكَ وَالْمُلْكَ، لَا شَرِيكَ لَكَ» ”حاضر ہوں میں اے اللہ! حاضر ہوں، میں حاضر ہوں۔ تیرا کوئی ساجھی نہیں، میں حاضر ہوں، بلاشبہ حمد تیری ہے، نعمتیں تیری ہیں اور ملک بھی تیرا ہے، تیرا کوئی شریک نہیں۔“ اور لوگوں نے بھی یہی تلبیہ پکارا جو وہ پکارتے ہیں۔ آپ صلی اللہ علیہ وسلم نے کسی کی تردید نہیں فرمائی۔ رسول اللہ صلی اللہ علیہ وسلم نے اپنے تلبیہ ہی کا التزام فرمایا۔ جابر رضی اللہ عنہ کہتے ہیں کہ ہماری نیت صرف حج کی تھی، ہم عمرہ نہیں جانتے تھے، حتیٰ کہ جب ہم آپ صلی اللہ علیہ وسلم کے ساتھ بیت اللہ میں پہنچ گئے۔ حجر اسود کا استلام کیا، تو تین چکروں میں رمل کیا (آہستہ آہستہ دوڑے) اور چار میں عام رفتار سے چلے۔ پھر آپ صلی اللہ علیہ وسلم مقام ابراہیم کی طرف آگے بڑھ گئے اور یہ آیت پڑھی ﴿وَاتَّخِذُوا مِنْ مَقَامِ إِبْرَاهِيمَ مُصَلًّى﴾ [سورة البقرة: 125] ”اور مقام ابراہیم کو اپنی جائے نماز بنا لو۔“ آپ صلی اللہ علیہ وسلم نے مقام ابراہیم کو اپنے اور بیت اللہ کے درمیان کیا (اور دو رکعتیں پڑھیں) جعفر رضی اللہ عنہ کہتے ہیں کہ میرے والد کہا کرتے تھے: جابر رضی اللہ عنہ نے نبی کریم صلی اللہ علیہ وسلم ہی سے بیان کیا کہ رسول اللہ صلی اللہ علیہ وسلم نے ان دو رکعتوں میں «قُلْ هُوَ اللَّهُ أَحَدٌ» اور «قُلْ يَا أَيُّهَا الْكَافِرُونَ» پڑھی۔ اس کے بعد آپ صلی اللہ علیہ وسلم کعبہ کی طرف لوٹے اور حجر اسود کا بوسہ لیا۔ پھر باب صفا سے صفا پہاڑی کی طرف تشریف لے گئے۔ پس جب صفا کے قریب پہنچے تو یہ آیت پڑھی ﴿إِنَّ الصَّفَا وَالْمَرْوَةَ مِنْ شَعَائِرِ اللَّهِ﴾ [سورة البقرة: 158] ”صفا اور مروہ اللہ کی نشانیوں میں سے ہیں۔“ (اور یہ بھی کہا) «نَبْدَأُ بِمَا بَدَأَ اللَّهُ بِهِ» ”ہم اس سے ابتداء کرتے ہیں جس کا ذکر اللہ عزوجل نے پہلے فرمایا ہے۔“ چنانچہ آپ صلی اللہ علیہ وسلم نے صفا سے ابتداء فرمائی اور اس پر چڑھ گئے حتیٰ کہ بیت اللہ نظر آنے لگا تو اللہ کی تکبیر و توحید بیان فرمائی اور کہا: «لَا إِلَهَ إِلَّا اللَّهُ وَحْدَهُ لَا شَرِيكَ لَهُ، لَهُ الْمُلْكُ وَلَهُ الْحَمْدُ، يُحْيِي وَيُمِيتُ، وَهُوَ عَلَى كُلِّ شَيْءٍ قَدِيرٌ، لَا إِلَهَ إِلَّا اللَّهُ وَحْدَهُ، أَنْجَزَ وَعْدَهُ، وَنَصَرَ عَبْدَهُ، وَهَزَمَ الْأَحْزَابَ وَحْدَهُ» ”ایک اللہ کے سوا اور کوئی معبود حقیقی نہیں۔ وہ اکیلا ہے اس کو کوئی ساجھی نہیں، سلطنت اس کی ہے، تعریف کا حقدار وہی ہے۔ وہی زندہ کرتا اور مارتا ہے، اور وہ ہر چیز پر پوری قدرت رکھتا۔ ایک اللہ کے سوا اور کوئی معبود حقیقی نہیں، وہ اکیلا ہے۔ اس نے اپنا وعدہ پورا کر دکھایا۔ اپنے بندے کی مدد فرمائی اور تمام گروہوں کو اس اکیلے ہی نے پسپا کر دیا۔“ پھر اس کے بعد دعا فرمائی۔ اور اس طرح تین بار (مذکورہ کلمات) کہے اور (ان کے درمیان میں) دعائیں کیں۔ پھر آپ صلی اللہ علیہ وسلم مروہ کی جانب اتر آئے۔ جب آپ صلی اللہ علیہ وسلم کے قدم وادی کے درمیان میں ٹک گئے تو آپ صلی اللہ علیہ وسلم نے اس کے دامن میں دوڑ لگائی۔ حتیٰ کہ جب چڑھائی آئی تو چلنے لگے حتیٰ کہ مروہ پر پہنچ گئے۔ آپ صلی اللہ علیہ وسلم نے مروہ پر بھی اسی طرح کیا جیسے کہ صفا پر کیا تھا۔ (وہی کلمات تین تین بار پڑھے اور ان کے درمیان میں دعائیں کیں) جب آپ صلی اللہ علیہ وسلم کا آخری چکر مروہ پر ختم ہوا تو فرمایا: ”اگر مجھے اپنے معاملے کا پہلے علم ہوتا جو بعد میں ہوا، تو میں قربانی ساتھ لے کر نہ چلتا اور میں اپنے اس طواف کو عمرہ بنا لیتا۔ پس تم لوگوں میں سے جس جس کے ساتھ قربانی نہیں ہے وہ حلال ہو جائے اور اپنے اس طواف کو عمرہ بنا لے۔“ چنانچہ سب لوگ حلال ہو گئے اور انہوں نے اپنے بال کتروا لیے۔ سوائے نبی کریم صلی اللہ علیہ وسلم اور ان لوگوں کے جن کے ساتھ قربانیاں تھیں۔ سیدنا سراقہ (بن مالک) بن جعشم رضی اللہ عنہ کھڑے ہوئے اور کہا: ”اے اللہ کے رسول! (ہمارا یہ عمرہ) اس سال کے لیے ہے یا ہمیشہ کے لیے؟“ تو رسول اللہ صلی اللہ علیہ وسلم نے اپنی انگلیاں ایک دوسری کے اندر داخل کر کے (اشارہ کرتے ہوئے) فرمایا: ”عمرہ حج کے اندر اس طرح داخل ہو گیا ہے۔“ آپ صلی اللہ علیہ وسلم نے دو دفعہ فرمایا: ”(اس سال کے لیے) نہیں بلکہ ہمیشہ ہمیش کے لیے۔ نہیں بلکہ ہمیشہ ہمیش کے لیے۔“ اور بیان کیا کہ سیدنا علی رضی اللہ عنہ یمن سے نبی کریم صلی اللہ علیہ وسلم کی قربانیاں لے کر آئے۔ انہوں نے (اپنی اہلیہ) سیدہ فاطمہ رضی اللہ عنہا کو دیکھا کہ وہ بھی ان لوگوں میں شامل ہیں جو حلال ہو چکے تھے۔ اس نے رنگین کپڑے پہن لیے تھے اور سرمہ لگایا تھا۔ سیدنا علی رضی اللہ عنہ نے اس پر ناگواری کا اظہار کیا۔ پوچھا کہ ”تمہیں ایسا کرنے کا کس نے کہا ہے؟“ انہوں نے کہا: ”میرے ابا نے۔“ سیدنا علی رضی اللہ عنہ جس زمانے میں عراق میں تھے، بیان کیا کرتے تھے کہ میں فاطمہ رضی اللہ عنہا کے اس عمل پر جو اس نے کیا تھا اور نبی کریم صلی اللہ علیہ وسلم کی طرف منسوب کیا تھا، ناراض ہو کر رسول اللہ صلی اللہ علیہ وسلم سے پوچھنے کے لیے گیا۔ میں نے آپ صلی اللہ علیہ وسلم کو بتایا کہ مجھے اس (فاطمہ رضی اللہ عنہا) کا یہ کام ناگوار گزرا ہے اور وہ کہتی ہیں کہ ”میرے ابا نے مجھے حکم دیا ہے۔“ آپ صلی اللہ علیہ وسلم نے فرمایا: ”وہ سچ کہتی ہے، سچ کہتی ہے۔ (تم اپنے متعلق بتاؤ کہ) تم نے حج کی نیت کرتے وقت کیا کہا تھا؟“ کہنے لگے کہ میں نے کہا تھا ”اے اللہ! میں وہی احرام باندھ رہا ہوں جس طرح کہ رسول اللہ صلی اللہ علیہ وسلم نے باندھا ہے۔“ آپ صلی اللہ علیہ وسلم نے فرمایا: ”میرے ساتھ تو قربانی ہے، چنانچہ تم بھی حلال نہ ہو۔“ جابر رضی اللہ عنہ نے بیان کیا کہ وہ قربانیاں، جو علی رضی اللہ عنہ یمن سے لائے تھے اور جو خود رسول اللہ صلی اللہ علیہ وسلم مدینہ سے لائے تھے، ان کی کل تعداد ایک سو تھی۔ چنانچہ سب لوگ حلال ہو گئے اور اپنے بال کتروا لیے، سوائے نبی کریم صلی اللہ علیہ وسلم اور ان لوگوں کے جن کے ساتھ قربانیاں تھیں۔ پھر جب (ذوالحجہ کی) آٹھویں تاریخ آئی (یوم الترویہ) اور لوگ منٰی کی طرف جانے لگے تو انہوں نے حج کا احرام باندھا۔ چنانچہ رسول اللہ صلی اللہ علیہ وسلم سوار ہو گئے اور منٰی جا کر ظہر، عصر، مغرب، عشاء اور صبح کی نمازیں پڑھیں۔ پھر آپ صلی اللہ علیہ وسلم تھوڑی دیر ٹھہرے حتیٰ کہ سورج نکل آیا۔ آپ صلی اللہ علیہ وسلم نے اپنے لیے بالوں کے بنے ہوئے خیمے کے متعلق حکم دیا اور وہ نمرہ میں لگا دیا گیا۔ چنانچہ رسول اللہ صلی اللہ علیہ وسلم چلے اور قریش کو یقین تھا کہ نبی کریم صلی اللہ علیہ وسلم مزدلفہ میں مشعر الحرام کے پاس ہی رک جائیں گے جیسے کہ وہ (قریش) اسلام سے پہلے جاہلیت میں کیا کرتے تھے۔ مگر رسول اللہ صلی اللہ علیہ وسلم اس سے آگے بڑھ گئے حتیٰ کہ عرفات پہنچے۔ آپ صلی اللہ علیہ وسلم نے دیکھا کہ نمرہ میں خیمہ لگا ہوا ہے۔ آپ صلی اللہ علیہ وسلم وہاں اترے حتیٰ کہ جب سورج ڈھل گیا تو آپ صلی اللہ علیہ وسلم نے (اپنی اونٹنی) قصواء کے متعلق فرمایا تو اسے تیار کر دیا گیا۔ آپ صلی اللہ علیہ وسلم اس پر سوار ہوئے حتیٰ کہ وادی (عرنہ) کے دامن میں آ گئے اور لوگوں کو خطبہ دیا۔ آپ صلی اللہ علیہ وسلم نے فرمایا: ”بلاشبہ تمہارے خون اور تمہارے مال تمہارے درمیان حرام ہیں جیسے کہ تمہارا یہ دن، تمہارا یہ مہینہ اور تمہارا یہ شہر حرمت والا ہے۔ خبردار! جاہلیت کے تمام امور میرے قدموں تلے روندے جا رہے ہیں۔ جاہلیت کے (سب) خون ختم کیے جاتے ہیں۔ اور سب سے پہلا خون جو میں ختم کرتا ہوں وہ ہمارا اپنا خون ہے، ابن ربیعہ کا۔“ (یہ امام ابوداؤد کے استاد) عثمان نے کہا: جب کہ (استاد) سلیمان نے کہا: ”ربیعہ بن حارث بن عبدالمطلب کا (خون ختم کرتا ہوں۔)“ ان کے بعض نے کہا: ”جو کہ بنی سعد میں دودھ پیتا بچہ تھا اور بنو ہذیل نے اسے قتل کر دیا تھا۔“ ”جاہلیت کے (تمام) سود ختم کیے جاتے ہیں۔ اور سب سے پہلا سود جو میں ختم کر رہا ہوں وہ ہمارا اپنا سود، عباس بن عبدالمطلب کا سود ہے، یہ سب ختم ہے۔ عورتوں کے بارے میں اللہ سے ڈرو۔ تم نے اللہ کی امانت سے ان پر اختیار حاصل کیا ہے اور اللہ کے کلمہ سے ان کی عصمتوں کو حلال جانا ہے۔ اور ان عورتوں پر بھی واجب ہے کہ تمہارے حقوق کا لحاظ رکھیں۔ (اور وہ) یہ کہ تمہارے بستروں پر وہ کسی کو نہ آنے دیں، جن کا آنا تمہیں ناگوار ہو۔ (تمہارے گھروں میں تمہارے ناپسندیدہ افراد کو، مرد ہوں یا عورتیں نہ آنے دیں۔) اگر وہ ایسا کریں تو انہیں مارو، مگر زخمی کرنے والی مار نہ ہو۔ اور تم پر واجب ہے کہ ان کا نان و نفقہ اور لباس معروف انداز میں مہیا کرو۔ بلاشبہ میں تم میں وہ چیز چھوڑے جا رہا ہوں کہ اگر تم اسے مضبوطی سے تھامے رہے، تو گمراہ نہ ہو گے (اور وہ ہے) اللہ کی کتاب۔ تم لوگوں سے میرے بارے میں پوچھا جائے گا، تو کیا جواب دو گے؟“ لوگوں نے کہا: ”ہم گواہی دیں گے کہ بلاشبہ آپ صلی اللہ علیہ وسلم نے (اللہ کا پیغام) پہنچا دیا، (پوری طرح) ادا کر دیا اور خیر خواہی (میں انتہا) کر دی۔“ آپ صلی اللہ علیہ وسلم اپنی شہادت کی انگلی آسمان کی طرف اٹھاتے اور لوگوں کی طرف جھکاتے تھے اور کہتے تھے: ”اے اللہ! گواہ رہنا۔ اے اللہ! گواہ رہنا۔ اے اللہ! گواہ رہنا۔“ پھر سیدنا بلال رضی اللہ عنہ نے اذان کہی، پھر اقامت کہی تو آپ صلی اللہ علیہ وسلم نے ظہر کی نماز پڑھائی۔ انہوں نے پھر اقامت کہی تو آپ صلی اللہ علیہ وسلم نے عصر کی نماز پڑھائی۔ اور ان (دونوں نمازوں) کے درمیان کچھ نہیں پڑھا (یعنی سنت یا نفل) پھر آپ صلی اللہ علیہ وسلم قصواء پر سوار ہو گئے حتی کہ مقام وقوف پر تشریف لائے۔ اپنی اونٹنی قصواء کا پیٹ پتھروں کی طرف کر دیا (یعنی وہیں رکے رہے) اور جبل المشاۃ کو (جو کہ ریت کا بڑا ٹیلہ تھا اور لوگ اس کو پیدل ہی عبور کرتے تھے) اپنے سامنے کیا، قبلہ رخ ہوئے اور پھر وہیں رکے رہے حتی کہ سورج غروب ہو گیا اور ٹکیہ کے غائب ہو جانے کے بعد کچھ زردی بھی ختم ہو گئی۔ پھر آپ صلی اللہ علیہ وسلم نے حضرت اسامہ بن زید رضی اللہ عنہ کو اپنے پیچھے بٹھا لیا اور چل دیے۔ رسول اللہ صلی اللہ علیہ وسلم نے اپنی اونٹنی قصواء کی باگ اس سختی سے کھینچی ہوئی تھی کہ اس کا سر پالان کے سرے کو لگ رہا تھا اور آپ صلی اللہ علیہ وسلم اپنے دائیں ہاتھ سے اشارہ کرتے ہوئے فرما رہے تھے: ”لوگو! سکون سے، لوگو! سکون سے۔“ آپ صلی اللہ علیہ وسلم جب کسی چڑھائی کے پاس آتے تو اونٹنی کی باگ قدرے ڈھیلی کر دیتے تاکہ (سہولت سے) چڑھ سکے۔ حتی کہ آپ صلی اللہ علیہ وسلم مزدلفہ پہنچ گئے اور مغرب اور عشاء کی نمازیں ایک اذان اور دو اقامتوں کے ساتھ جمع کر کے پڑھیں۔ عثمان نے بیان کیا: ”آپ صلی اللہ علیہ وسلم نے ان کے درمیان کوئی سنت نفل نہیں پڑھے۔“ سب راویوں کا متفقہ بیان ہے کہ پھر رسول اللہ صلی اللہ علیہ وسلم لیٹ گئے حتی کہ فجر طلوع ہو گئی۔ جب صبح نمایاں ہو گئی تو آپ صلی اللہ علیہ وسلم نے فجر کی نماز پڑھائی۔ (استاد) سلیمان کا بیان ہے کہ ”ایک اذان اور ایک اقامت کے ساتھ۔“ (سب کا متفقہ بیان ہے) پھر آپ صلی اللہ علیہ وسلم قصواء پر سوار ہوئے حتی کہ المشعر الحرام کے پاس آ گئے، پھر اس پر چڑھ گئے۔ عثمان اور سلیمان کا بیان ہے کہ آپ صلی اللہ علیہ وسلم نے قبلہ کی طرف رخ کیا۔ اللہ کی حمد، تکبیر اور تہلیل بیان کی۔ عثمان نے اضافہ کیا: اور توحید بیان کی۔ اور پھر وہیں رکے رہے حتی کہ خوب سفیدی ہو گئی۔ پھر اللہ کے رسول صلی اللہ علیہ وسلم وہاں سے چل دیے، سورج طلوع ہونے سے پہلے ہی۔ اور حضرت فضل بن عباس رضی اللہ عنہ کو اپنے ساتھ سوار کر لیا۔ اور وہ قدرے گھنگریالے خوبصورت بالوں والے، گورے چٹے، حسین و جمیل جوان تھے۔ جب رسول اللہ صلی اللہ علیہ وسلم وہاں سے روانہ ہوئے تو عورتیں بھی اپنے کجاووں میں بیٹھی وہاں سے گزریں۔ فضل رضی اللہ عنہ انہیں دیکھنے لگے تو رسول اللہ صلی اللہ علیہ وسلم نے اس کے چہرے پر ہاتھ رکھ دیا۔ فضل رضی اللہ عنہ اپنا چہرہ کسی اور طرف پھیر کر دیکھنے لگے۔ حتی کہ آپ صلی اللہ علیہ وسلم وادی محسر میں پہنچ گئے اور قدرے تیز چلے۔ پھر آپ صلی اللہ علیہ وسلم درمیان والی راہ پر چل پڑے جو تمہیں جمرہ کبری تک پہنچاتی ہے حتی کہ آپ صلی اللہ علیہ وسلم جمرہ کے پاس آ گئے جو کہ درخت کے پاس ہے۔ تو آپ صلی اللہ علیہ وسلم نے اس کو سات کنکریاں ماریں جیسی کہ انگلیوں پر رکھ کر ماری جاتی ہیں۔ ہر کنکری کے ساتھ آپ صلی اللہ علیہ وسلم «اللَّهُ أَكْبَرُ» کہتے تھے۔ آپ صلی اللہ علیہ وسلم نے وادی کے دامن کی طرف سے کنکریاں ماریں۔ پھر رسول اللہ صلی اللہ علیہ وسلم قربان گاہ کی طرف تشریف لے گئے اور اپنے ہاتھ سے تریسٹھ اونٹنیاں نحر کیں اور بقیہ کے متعلق سیدنا علی رضی اللہ عنہ کو حکم دیا اور ان کو اپنی قربانی میں شریک بنایا۔ پھر آپ صلی اللہ علیہ وسلم نے ہر قربانی سے ایک ایک ٹکڑا گوشت لینے کا حکم دیا۔ اسے دیگ میں ڈال کر پکایا تو آپ صلی اللہ علیہ وسلم دونوں نے اس گوشت میں سے کھایا اور شوربا نوش فرمایا۔ سلیمان کا بیان ہے: پھر رسول اللہ صلی اللہ علیہ وسلم سوار ہوئے اور بیت اللہ کی طرف چل دیے اور مکہ آ کر ظہر کی نماز ادا فرمائی۔ پھر آپ صلی اللہ علیہ وسلم بنی عبدالمطلب کے پاس آئے، وہ لوگ چاہ زمزم پر پانی پلا رہے تھے۔ آپ صلی اللہ علیہ وسلم نے فرمایا: ”اے بنی عبدالمطلب! پانی نکالو۔ اگر یہ اندیشہ نہ ہوتا کہ لوگ تمہارے اس پانی پلانے میں تم پر غالب آ جائیں گے تو میں بھی تمہارے ساتھ پانی نکالتا۔“ سو انہوں نے نبی کریم صلی اللہ علیہ وسلم کو ایک ڈول دیا اور آپ صلی اللہ علیہ وسلم نے اس سے پانی نوش فرمایا۔ [سنن ابي داود/كِتَاب الْمَنَاسِكِ/حدیث: 1905]

جناب جعفر (جعفر الصادق) رحمہ اللہ اپنے والد (محمد بن علی رحمہ اللہ) سے روایت کرتے ہیں کہ ”نبی کریم صلی اللہ علیہ وسلم نے عرفات میں ظہر اور عصر کی نمازیں ایک اذان اور دو اقامتوں کے ساتھ پڑھی تھیں، اور ان کے مابین کوئی سنتیں (نفل) نہیں پڑھے تھے۔ اور مغرب اور عشاء کی نمازیں مزدلفہ میں ایک اذان اور دو اقامتوں کے ساتھ پڑھی تھیں، اور ان کے مابین کوئی سنتیں (نفل) نہیں پڑھے تھے۔“ امام ابوداؤد رحمہ اللہ کہتے ہیں کہ ”اس روایت کو حاتم بن اسماعیل نے اپنی طویل حدیث میں مسند بیان کیا ہے (جبکہ یہ سند مرسل ہے۔ حاتم نے سیدنا جابر رضی اللہ عنہ سے مسند بیان کی ہے) اور حاتم کی روایت کے مسند ہونے کی موافقت محمد بن علی الجعفی نے بھی کی ہے اور «جَعْفَرٍ، عَنْ أَبِيهِ، عَنْ جَابِرٍ» کی سند سے روایت کی ہے۔ فرق اتنا ہے کہ جعفی نے کہا: «فَصَلَّى الْمَغْرِبَ وَالْعَتَمَةَ بِأَذَانٍ وَإِقَامَةٍ» ”آپ صلی اللہ علیہ وسلم نے مغرب اور عشاء ایک اذان اور ایک اقامت سے پڑھی۔““ امام ابوداؤد رحمہ اللہ کہتے ہیں کہ ”مجھے امام احمد رحمہ اللہ نے کہا کہ حاتم نے اس طویل حدیث میں خطا کی ہے۔“ [سنن ابي داود/كِتَاب الْمَنَاسِكِ/حدیث: 1906]

سیدنا جابر بن عبداللہ رضی اللہ عنہ سے بیان ہے کہ پھر نبی کریم صلی اللہ علیہ وسلم نے فرمایا: ”میں نے یہاں نحر کیا ہے اور منیٰ سارے کا سارا قربان گاہ ہے۔“ آپ صلی اللہ علیہ وسلم نے عرفات میں وقوف کیا تو فرمایا: ”میں نے یہاں وقوف کیا ہے اور سارا عرفات جائے وقوف ہے۔“ آپ صلی اللہ علیہ وسلم نے مزدلفہ میں وقوف کیا اور فرمایا: ”میں نے اس جگہ وقوف کیا ہے اور تمام مزدلفہ جائے وقوف ہے۔“ [سنن ابي داود/كِتَاب الْمَنَاسِكِ/حدیث: 1907]

حفص بن غیاث نے جعفر (صادق) رضی اللہ عنہ سے ان کی سند سے روایت کیا تو مزید کہا: ”تو تم اپنے اپنے پڑاؤ پر نحر کرو۔“ [سنن ابي داود/كِتَاب الْمَنَاسِكِ/حدیث: 1908]

جناب جعفر (صادق) رحمہ اللہ نے بیان کیا کہ ”مجھے میرے والد (محمد باقر رحمہ اللہ) نے سیدنا جابر رضی اللہ عنہ سے بیان کیا۔“ اور یہ حدیث بیان کی۔ اور اپنی حدیث پر ﴿وَاتَّخِذُوا مِنْ مَقَامِ إِبْرَاهِيمَ مُصَلًّى﴾ [سورة البقرة: 125] کی جگہ یہ بات اپنی طرف سے بڑھائی کہ ”آپ صلی اللہ علیہ وسلم نے ان رکعات میں توحید (یعنی) «قُلْ هُوَ اللّٰهُ أَحَدٌ» ”کہہ دیجیے، وہ اللہ ایک ہے“ اور «قُلْ يَا أَيُّهَا الْكَافِرُونَ» ”کہہ دیجیے، اے کافروں“ کی تلاوت کی (یہ جملہ مدرج ہے۔)“ اور اس میں بیان کیا کہ ”سیدنا علی رضی اللہ عنہ نے یہ واقعہ کوفہ میں بیان کیا تھا۔“ میرے والد (محمد بن علی رحمہ اللہ) نے کہا کہ ”جابر رضی اللہ عنہ نے یہ لفظ بھی نہیں کہے تھے کہ ”میں غصے کے عالم میں جلدی سے گیا تھا۔“ اور سیدہ فاطمہ رضی اللہ عنہا کا قصہ بیان کیا۔“ [سنن ابي داود/كِتَاب الْمَنَاسِكِ/حدیث: 1909]