سیدنا علی بن ابی طالب رضی اللہ عنہ سے: الَّذِیْنَ ھُمْ فِیْ صَلًاتِھِمْ خٰشِعُوْنَ (المؤمنون: 2) ” وہ جو اپنی نماز میں گڑگڑاتے ہیں “۔ کے متعلق پوچھا گیا تو آپ نے فرمایا: خشوع دل میں ہوتا ہے اور یہ کہ تم مسلمان کے لیے سہارا بنو اور یہ کہ نماز کے دوران (ادھر اُدھر) توجہ مت کرو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3524]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نماز میں اپنی نگاہ آسمان کی طرف رکھتے تھے پھر یہ آیت نازل ہوئی: الَّذِیْنَ ھُمْ فِیْ صَلًاتِھِمْ خٰشِعُوْنَ (المؤمنون: 2) ” وہ جو اپنی نماز میں گڑگڑاتے ہیں “۔ تو آپ صلی اللہ علیہ وسلم نے اپنے سر کو جھکانا شروع کر دیا۔ ٭٭ کیونکہ اس کی سند میں محمد (نامی راوی) سے یہ حدیث مرسلاً روایت کرنے کا بھی ایک قول موجود ہے۔ اس لیے اگر محمد کے متعلق یہ اختلاف نہ ہو تو یہ حدیث امام بخاری اور امام مسلم رحمۃ اللہ علیہ کے معیار پر صحیح ہے لیکن انہوں نے اس کو نقل نہیں کیا ہے۔ [المستدرك على الصحيحين/كِتَابُ التَّفْسِيرِ/حدیث: 3525]