سیدنا جابر رضی اللہ عنہ فرماتے ہیں: ایک انصاری شخص کی ایک مسیکہ (نامی لونڈی) تھی اس نے (رسول اکرم صلی اللہ علیہ وسلم کی بارگاہ میں) عرض کی: یا رسول اللہ صلی اللہ علیہ وسلم ! میرا آقا مجھے زنا کروانے پر مجبور کرتا ہے۔ تب یہ آیت نازل ہوئی: وَلَا تُکْرِھُوْا فَتَیٰاتِکُمْ عَلَی الْبِغَآء اِنْ اَرَدْنَ تَحَصُّنًا (النور: 33) ” اور مجبور نہ کرو اپنی کنیزوں کو بدکاری پر جب کہ وہ بچنا چاہیں “۔۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3544]

سیدنا عبداللہ بن عباس رضی اللہ عنہما اللہ تعالیٰ کے ارشاد: اَللّٰہُ نُوْرُ السَّمٰوٰتِ وَ الْاَرْضِ مَثَلُ نُوْرِ من امن باللہ کَمِشْکٰاۃٍ (النور: 35) ” اللہ نور ہے آسمانوں اور زمینوں کا، اس کے نور کی مثال ایسی جیسے ایک طاق “۔ کے متعلق فرماتے ہیں (مشکوٰۃ کا معنی) روشندان ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3545]