سیدنا عبداللہ بن عباس رضی اللہ عنہما فرماتے ہیں: مسلمان یہ چاہتے تھے کہ روم، فارس پر غالب آئے کیونکہ روم والے لوگ اہل کتاب تھے اور مشرکین یہ چاہتے تھے فارس، روم پر غالب آئے کیونکہ وہ بتوں کے پجاری تھے۔ مسلمانوں نے یہ بات سیدنا ابوبکر صدیق رضی اللہ عنہ سے ذکر کی اور سیدنا ابوبکر رضی اللہ عنہ نے اس کا تذکرہ رسول اللہ صلی اللہ علیہ وسلم سے کیا۔ نبی اکرم صلی اللہ علیہ وسلم نے فرمایا: بہرحال ان کو شکست ہو گی (یعنی فارس کو) سیدنا ابوبکر رضی اللہ عنہ نے یہ بات ان سے کی۔ انہوں نے کہا: ہمارے ساتھ شرط رکھ لو اگر وہ (روم) غالب آئیں گے تو تمہارے لیے اتنا اتنا انعام ہو گا اور اگر ہم جیت گئے تو ہمارے لیے اتنا اتنا انعام ہو گا۔ آپ نے ان کے لیے پانچ سال کی مدت مقرر کر دی۔ لیکن اس عرصے میں (روم) غالب نہ آ سکا۔ سیدنا ابوبکر رضی اللہ عنہ نے نبی اکرم صلی اللہ علیہ وسلم سے اس بات کا تذکرہ کیا۔ تو آپ صلی اللہ علیہ وسلم نے فرمایا: میں جو کچھ دیکھ رہا تھا وہ کہہ دیا۔ آپ صلی اللہ علیہ وسلم نے فرمایا: دس سال سے پہلے پہلے (روم غالب آ جائے گا) آپ فرماتے ہیں: اس کے بعد روم غالب آ گئے۔ یہی مطلب ہے اللہ تعالیٰ کے ارشاد: الٓمّٓ (الروم: 1) غُلِبَتِ الرُّوْمُ (الروم: 2) فِیْٓ اَدْنَی الْاَرْضِ وَھُمْ مِّنْ بَعْدِ غَلَبِھِمْ سَیَغْلِبُوْنَ (الروم: 3) رومی مغلوب ہوئے۔ پاس کی زمین میں اور اپنی مغلوبی کے بعد عنقریب غالب ہوں گے “۔ چنانچہ روم مغلوب ہوئے پھر اس کے بعد غالب ہوئے۔ لِلّٰہِ الْاَمْرُ مِنْ قَبْلُ وَمِنْ بَعْدُ، وَ یَوْمَئِذٍ یَّفْرَحُ الْمُؤْمِنُوْنَ بِنَصْرِ اللّٰہِ (الروم: 4) ” حکم اللہ ہی کا ہے آگے اور پیچھے اور اس دن ایمان والے خوش ہوں گے اللہ کی مدد سے “۔ (،) سیدنا سفیان فرماتے ہیں: میں نے سنا ہے کہ وہ لوگ بدر کے دن غالب ہوئے (یعنی اہل روم اسی دن فارس پر غالب جس دن غزوۂ بدر ہوا تھا) ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3582]