سیدنا عبداللہ بن عباس رضی اللہ عنہما سے اللہ تعالیٰ کے اس فرمان ﴿مَا جَعَلَ اللَّهُ لِرَجُلٍ مِنْ قَلْبَيْنِ فِي جَوْفِهِ﴾ [سورة الأحزاب: 4] کے متعلق روایت ہے، قابوس بن ابی ظبیان کہتے ہیں کہ میں نے ابن عباس سے پوچھا کہ اس کا کیا مفہوم ہے؟ انہوں نے فرمایا: ایک مرتبہ اللہ کے نبی صلی اللہ علیہ وسلم کھڑے ہوئے تو آپ کے ذہن میں ایک خیال گزرا (یا آپ سے کوئی سہو ہوا)، اس پر ان منافقین نے جو آپ صلی اللہ علیہ وسلم کے ساتھ نماز پڑھتے تھے، کہا: ”دیکھو! ان کے دو دل ہیں؛ ایک دل ان (مسلمانوں) کے ساتھ ہے اور ایک تمہارے ساتھ،“ تب اللہ عزوجل نے یہ آیت نازل فرمائی کہ اللہ نے کسی آدمی کے سینے میں دو دل نہیں بنائے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3597]

سیدنا عبداللہ بن عباس رضی اللہ عنہما سے روایت ہے کہ وہ اس آیت کو (اس طرح) پڑھا کرتے تھے: ﴿النَّبِيُّ أَوْلَى بِالْمُؤْمِنِينَ مِنْ أَنْفُسِهِمْ وَهُوَ أَبٌ لَهُمْ وَأَزْوَاجُهُ أُمَّهَاتُهُمْ﴾ ”نبی مومنوں پر خود ان کی جانوں سے بھی زیادہ حق رکھتے ہیں اور وہ ان کے والد ہیں اور ان کی بیویاں ان کی مائیں ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3598]

موسیٰ بن طلحہ سے روایت ہے کہ (ایک مرتبہ) عائشہ بنت طلحہ اپنی والدہ ام کلثوم بنت ابی بکر سے کہہ رہی تھیں: ”میرے والد (طلحہ) تمہارے والد (ابوبکر) سے بہتر ہیں،“ تو ام المومنین سیدہ عائشہ رضی اللہ عنہا نے فرمایا: ”کیا میں تمہارے درمیان فیصلہ نہ کر دوں؟ جب سیدنا ابوبکر رضی اللہ عنہ نبی کریم صلی اللہ علیہ وسلم کے پاس آئے تو آپ صلی اللہ علیہ وسلم نے فرمایا: اے ابوبکر! تم آگ سے اللہ کے آزاد کردہ (عتیق اللہ) ہو،“ پس اسی دن سے ان کا نام عتیق پڑ گیا، ”اور جب طلحہ رضی اللہ عنہ نبی کریم صلی اللہ علیہ وسلم کی خدمت میں آئے تو آپ صلی اللہ علیہ وسلم نے فرمایا: اے طلحہ! تم ان لوگوں میں سے ہو جنہوں نے اپنی نذر (جان کی قربانی کا عہد) پوری کر دی۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3599]