سیدنا ابوظبیان رضی اللہ عنہ کہتے ہیں: میں نے سیدنا عبداللہ بن عباس رضی اللہ عنہما سے پوچھا کہ اس آیت کا مطلب کیا ہے: مَا جَعَلَ اللّٰہُ لِرَجُلٍ مِّنْ قَلْبَیْنِ فِیْ جَوْفِہٖ (الاحزاب: 4) ” اللہ نے کسی آدمی کے اندر دو دل نہ رکھے “۔ انہوں نے فرمایا: ایک دفعہ نبی اکرم صلی اللہ علیہ وسلم قیام میں تھے کہ آپ کو کوئی بات سوجھی تو جو منافقین آپ کے ہمراہ نماز پڑھ رہے تھے، انہوں نے کہا: کیا تم نہیں دیکھ رہے کہ اس کے دو دل ہیں؟ ایک دل ان کے ساتھ اور ایک دل تمہارے ساتھ۔ تو اللہ تعالیٰ نے یہ آیت نازل فرمائی: مَا جَعَلَ اللّٰہُ لِرَجُلٍ مِّنْ قَلْبَیْنِ فِیْ جَوْفِہٖ (الاحزاب: 4) ” اللہ نے کسی آدمی کے اندر دو دل نہ رکھے “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3597]

سیدنا عبداللہ بن عباس رضی اللہ عنہما یہ آیت پڑھا کرتے تھے: اَلنَّبِیُّ اَوْلٰی بِالْمُؤْمِنِیْنَ مِنْ اَنْفُسِھِمْ “ وَ ھو اَب لھم ” و اَزْوَاجُہٗٓ اُمَّھٰتُھُمْ (الاحزاب: 6) ” یہ نبی مسلمانوں کا ان کی جان سے زیادہ مالک ہے “۔ اور وہ ان کا باپ ہے ” وازواجہ امھاتھم “ اور اس کی بیبیاں ان کی مائیں ہیں “۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3598]

سیدنا موسیٰ بن طلحہ رضی اللہ عنہ کہتے ہیں: ایک دفعہ عائشہ بنت طلحہ رحمۃ اللہ علیہما نے اپنی والدہ ام کلثوم بنت ابی بکر رضی اللہ عنہا سے کہا: میرا باپ تیرے باپ سے زیادہ فضیلت والا ہے۔ اس پر ام المومنین سیدہ عائشہ صدیقہ رضی اللہ عنہا نے فرمایا: تمہارے درمیان میں فیصلہ کرتی ہوں۔ ایک دفعہ سیدنا ابوبکر رضی اللہ عنہ، نبی اکرم صلی اللہ علیہ وسلم کی خدمت میں حاضر ہوئے۔ آپ نے فرمایا: اے ابوبکر رضی اللہ عنہ تم ” عَتِیْقُ اللّٰہِ مِنَ النَّارِ “ دوزخ سے اللہ تعالیٰ کے آزاد کردہ ہو۔ میں نے کہا: اسی دن سے ان کا نام ” عتیق “ ہو گیا۔ (یونہی) سیدنا طلحہ رضی اللہ عنہ، نبی اکرم صلی اللہ علیہ وسلم کی خدمت میں حاضر ہوئے تو آپ نے فرمایا: اے ابوطلحہ رضی اللہ عنہ تو ان لوگوں میں سے ہے جنہوں نے اپنی محنت وصول کر لی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3599]