سیدنا عبداللہ بن عباس رضی اللہ عنہما اس آیت: لَا تَکُوْنُوْا کَالَّذِیْنَ ٰاذَوْا مُوْسٰی “ (الاحزاب: 69) ” اے ایمان والو! ان جیسے نہ ہونا جنہوں نے موسیٰ کو ستایا “۔ کے متعلق فرماتے ہیں۔ سیدنا موسیٰ علیہ السلام کی قوم نے ان کے بارے میں کہا: کہ ان کو ” ادرہ “ (آماس خصیہ) کی بیماری ہے۔ ایک مرتبہ آپ نہانے کے لیے نکلے، آپ نے اپنے کپڑے اُتار کر ایک پتھر پر رکھے، وہ پتھر آپ کے کپڑے لے کر بھاگ گیا۔ سیدنا موسیٰ علیہ السلام کپڑے لینے کے لیے ننگے ہی اس کے پیچھے بھاگ نکلے یہاں تک کہ وہ بنی اسرائیل کی مجالس تک جا پہنچا۔ انہوں نے آپ کو دیکھ لیا کہ آپ کو ” ادرۃ “ (آماس خصیہ) کی بیماری نہیں ہے۔ یہ اللہ تعالیٰ کے اس قول کا مطلب ہے: فَبَرَّاَہُ اللّٰہُ مِمَّا قَالُوْٓا وَکَانَ عِنْدَاللّٰہِ وَجِیْھًا (الاحزاب: 69) ” تو اللہ نے اسے بری فرما دیا اس بات سے جو انہوں نے کہی اور موسیٰ اللہ کے یہاں آبرو والا ہے “۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے اس اسناد کے ہمراہ نقل نہیں کیا۔ لیکن انہوں نے اس کو اس سند کے ہمراہ نقل نہیں کیا ہے۔ [المستدرك على الصحيحين/كِتَابُ التَّفْسِيرِ/حدیث: 3621]

سیدنا عبداللہ بن عباس رضی اللہ عنہما اس آیت: اِنَّا عَرَضْنَا الْاَمَانَۃَ عَلَی السَّمٰوٰتِ وَ الْاَرْضِ وَ الْجِبَالِ فَاَبَیْنَ اَنْ یّحْمِلْنَھَا وَ اَشْفَقْنَ مِنْھَا (الاحزاب: 72) ” بے شک ہم نے امانت پیش فرمائی آسمانوں اور زمین اور پہاڑوں پر تو انہوں نے اس کے اٹھانے سے انکار کر دیا اور اس سے ڈر گئے “۔ کے متعلق فرماتے ہیں: آدم علیہ السلام سے کہا گیا: کیا تو اس کو لیتا ہے ان تمام ذمہ داریوں سمیت جوان میں ہیں؟ اگر تو اطاعت کرے گا تو میں تیری مغفرت کر دوں گا اور اگر تو نافرمانی کرے گا تو تجھے بچاؤں گا۔ آدم علیہ السلام نے کہا: مجھے قبول ہے۔ آپ فرماتے ہیں: ابھی اتنا وقت بھی نہیں گزرا تھا جتنا عصر سے مغرب کے درمیان کہ ان سے خطا سرزد ہو گئی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3622]

سیدنا ابی بن کعب رضی اللہ عنہ ” اِنَّا عَرَضْنَا الْاَمَانَۃَ عَلَی السَّمٰوٰتِ وَ الْاَرْضِ وَ الْجِبَالِ “ کے متعلق فرماتے ہیں: امانت میں سے یہ بھی ہے کہ عورت کو اس کی شرمگاہ امانت دی گئی۔ [المستدرك على الصحيحين/كِتَابُ التَّفْسِيرِ/حدیث: 3623]