سیدنا انس رضی اللہ عنہ سے مروی ہے کہ نبی اکرم صلی اللہ علیہ وسلم نے فرمایا: بیت المعمور ساتویں آسمان پر ہے، روزانہ 70 ہزار ملائکہ وہاں جاتے ہیں (جو ایک مرتبہ حاضری دیتے ہیں) ان کی باری دوبارہ قیامت تک نہیں آئے گی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3784]

سیدنا علی بن ابی طالب رضی اللہ عنہ فرماتے ہیں: اللہ تعالیٰ کے ارشاد:” السقف المرفوع “ (بلند چھت) سے مراد ” آسمان “ ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3785]

سیدنا عبداللہ بن عباس رضی اللہ عنہما اللہ تعالیٰ کے ارشاد: اَلْحَقْنَا بِھِمْ ذُرِّیَّتَھُمْ وَ مَآ اَلَتْنٰھُمْ (الطور: 21) ” ہم نے ان کی اولادیں ان سے ملا دیں “۔ کے متعلق فرماتے ہیں: اللہ تعالیٰ مومنوں کی اولاد کو جنت میں، ان کے درجے میں شامل کر دے گا، اگرچہ وہ عمل میں ان سے کم ہوں پھر یہ آیت پڑھی: وَ الَّذِیْنَ ٰامَنُوْا وَ اتَّبَعَتْھُمْ ذُرِّیَّتُھُمْ بِاِیْمَانٍ اَلْحَقْنَا بِھِمْ ذُرِّیَّتَھُمْ وَ مَآ اَلَتْنٰھُمْ) (الطور: 21) ” اور جو ایمان لائے اور ان کی اولاد نے ایمان کے ساتھ ان کی پیروی کی ہم نے ان کی اولادیں ان کے ساتھ ملا دیں اور ان کے عمل میں کچھ کمی نہیں کی۔“ [المستدرك على الصحيحين/كِتَابُ التَّفْسِيرِ/حدیث: 3786]