سیدنا عبداللہ بن عباس رضی اللہ عنہما فرماتے ہیں: نبی اکرم صلی اللہ علیہ وسلم نے سورۃ النجم میں سجدہ کیا اور اس میں تمام مسلمانوں نے، مشرکوں نے، انسانوں نے اور جنات نے بھی سجدہ کیا۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے اس اسناد کے ہمراہ نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3787]

سیدنا عبداللہ رضی اللہ عنہ اللہ تعالیٰ کے ارشاد: مَا کَذَبَ الْفُؤَادُ مَا رَاٰی) (النجم: 11) ” دل نے جھوٹ نہ کہا جو دیکھا۔“ کے متعلق فرماتے ہیں، رسول اللہ صلی اللہ علیہ وسلم نے سیدنا جبرائیل علیہ السلام کو قیمتی ریشمی جبہ میں دیکھا جو کہ زمین و آسمان کے درمیان بھرے ہوئے تھے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3788]

سیدنا عبداللہ بن عباس رضی اللہ عنہما فرماتے ہیں: کیا تمہیں یہ بات پسند ہے کہ خلت، سیدنا ابراہیم علیہ السلام کے لیے، کلام سیدنا موسیٰ علیہ السلام کے لئے اور دیدار (الٰہی) سیدنا محمد صلی اللہ علیہ وسلم کے لئے ہو؟۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3789]