سیدنا عبداللہ بن عباس رضی اللہ عنہما اللہ تعالیٰ کے ارشاد: ”کُلَّ یَوْمٍ ھُوَ فِیْ شَاْنٍ“ ” اسے ہر دن ایک کام ہے۔“ کے متعلق فرماتے ہیں: اللہ تعالیٰ نے جس چیز سے لوح محفوظ بنائی ہے، وہ سفید موتی ہے، اس کے دونوں کنارے سرخ یاقوت کے ہیں، اس کا قلم اور لکھائی نور کی ہے۔ اللہ تعالیٰ کو ایک دن میں تین سو ستر مرتبہ دیکھتا ہے اور ہر نظر میں پیدا کرتا ہے، رزق دیتا ہے، زندہ کرتا ہے، مارتا ہے، عزت دیتا ہے، ذلت دیتا ہے اور جو چاہتا ہے کرتا ہے۔ یہ مطلب ہے: اس کے فرمان ”کُلَّ یَوْمٍ ھُوَ فِیْ شَأنٍ“ کا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3813]

سیدنا ابوموسیٰ ”وَلِمَنْ خَافَ مَقَامَ رَبِّہٖ جَنَّتٰنِ“ ” اور جو اپنے رب کے حضور کھڑے ہونے سے ڈرے، اس کے لیے دو جنتیں ہیں۔“ کے بارے میں فرماتے ہیں: پہل کرنے والوں کے لئے سونے کی اور بعد والوں کے لئے چاندی کی۔ [المستدرك على الصحيحين/كِتَابُ التَّفْسِيرِ/حدیث: 3814]

سیدنا عبداللہ بن مسعود رضی اللہ عنہ اللہ تعالیٰ کے ارشاد: ”بَطَآئِنُہَا مِنْ اِسْتَبْرَقٍ“ ” جن کا استر قنادیز کا۔“ کے بارے میں فرماتے ہیں: یہ تو تمہیں ان کی اندرونی حالت بتائی گئی ہے (اس سے اندازہ لگاؤ کہ) اس کے ظاہر کا کیا عالم ہو گا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3815]