سیدنا حجر بن قیس المدری رحمۃ اللہ علیہ فرماتے ہیں: میں نے امیرالمومنین سیدنا علی رضی اللہ عنہ کے ہاں رات گزاری۔ آپ رات میں نماز پڑھ رہے تھے، میں نے ان کو نماز میں (سورہ واقعہ کی) قراءت کرتے ہوئے سنا۔ جب آپ اس آیت پر پہنچے: اَفَرَئَیْتُمْ مَّا تُمْنُوْنَ اَاَنْتُمْ تَخْلُقُوْنَہٗٓ اَمْ نَحْنُ الْخَالِقُوْنَ) (الواقعۃ: 58، 59) ” تو بھلا دیکھو تو وہ منی جو گراتے ہو، کیا تم اس کا آدمی بناتے ہو یا ہم بنانے والے ہیں۔“ تو آپ نے تین مرتبہ کہا: اے رب العالمین بلکہ تو ہی بنانے والا ہے۔ پھر یہ آیت پڑھی: اَفَرَئَیْتُمْ مَّا تَحْرُثُوْنَ اَاَنْتُمْ تَزْرَعُوْنَہٗٓ اَمْ نَحْنُ الزّٰرِعُوْنَ) (الواقعۃ: 63، 64) ” تو بھلا بتاؤ تو جو بوتے ہو، کیا تم اس کی کھیتی بناتے ہو یا ہم بنانے والے ہیں۔“ تو آپ نے کہا: بلکہ تو ہی ہے اے میرے رب، بلکہ تو ہی ہے اے میرے رب، بلکہ تو ہی ہے اے میرے رب۔ پھر آپ نے یہ آیت پڑھی: اَفَرَئَیْتُمُ الْمَآءَ الَّذِیْ تَشْرَبُوْنَ اَاَنْتُمْ اَنْزَلْتُمُوْہُ مِنَ الْمُزْنِ اَمْ نَحْنُ الْمُنْزِلُوْنَ) (الواقعۃ: 68، 69) ” تو بھلا بتا تو وہ پانی جو پیتے ہو، کیا تم نے اسے بادل سے اتارا یا ہم اتارنے والے ہیں۔“ آپ نے تین مرتبہ کہا: بلکہ تو ہی ہے اے میرے رب۔ پھر آپ نے یہ آیت پڑھی: اَفَرَئَیْتُمُ النَّارَ الَّتِیْ تُوْرُوْنَ اَاَنْتُمْ اَنْشَاْتُمْ شَجَرَتَھَآ اَمْ نَحْنُ الْمُنْشِئُوْنَ) (الواقعۃ: 71، 72) ” تو بھلا بتاؤ تو وہ آگ جو تم روشن کرتے ہو، کیا تم نے اس کا پیڑ پیدا کیا یا ہم ہیں پیدا کرنے والے۔“ آپ نے تین مرتبہ کہا: بلکہ تو ہی ہے اے میرے رب۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3822]

حصرت عبداللہ بن عباس رضی اللہ عنہما فرماتے ہیں: قرآن کریم شب قدر میں اوپر والے آسمان سے آسمان دنیا پر یکبارگی نازل ہوا پھر متعدد سالوں میں الگ الگ نازل ہوا۔ پھر آپ نے اس آیت کی تلاوت کی: فَلَأٓ اُقْسِمُ بِمَواٰاقِعِ النُّجُوْمِ (الواقعۃ: 75) ” تو مجھے قسم ہے ان جگہوں کی جہاں تارے ڈوبتے ہیں۔“ آپ فرماتے ہیں: پھر قرآن تھوڑا تھوڑا نازل ہوا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3823]

عبدالرحمن بن یزیلہ رحمۃ اللہ علیہ فرماتے ہیں: ہم سیدنا سلیمان رضی اللہ عنہ کے ہمراہ تھے، وہ قضائے حاجت کے لئے گئے اور ہماری آنکھوں سے اوجھل ہو گئے پھر آپ قضائے حاجت سے فارغ ہو کر ہمارے پاس آ گئے۔ اس وقت ہمارے پاس یا ان کے پاس پانی نہ تھا (کہ وضو کیا جا سکے) ہم نے ان سے کہا: اے ابوعبداللہ رضی اللہ عنہ! اگر آپ باوضو ہوتے تو ہم آپ سے قرآن کریم کے متعلق کچھ مسائل پوچھتے۔ آپ نے فرمایا: تم سوال کرو، میں قرآن پاک کو چھوؤں گا نہیں۔ پھر آپ نے کہا: اس کو چھونے کے لئے باوضو ہونا ضروری ہے (چھوئے بعیر اس کی تلاوت بے وضو کی جا سکتی ہے)۔ پھر آپ نے ان آیات کی تلاوت کی: {إِنَّهُ لَقُرْآنٌ كَرِيمٌ فِي كِتَابٍ مَكْنُونٍ لَا يَمَسُّهُ إِلَّا الْمُطَهَّرُونَ} [الواقعة: 78] ” بیشک یہ عزت والا قرآن ہے اسے نہ چھوئیں مگر باوضو۔“ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3824]

سیدنا عقبہ بن عامر جہنی رضی اللہ عنہ فرماتے ہیں: جب یہ آیت نازل ہوئی: فَسَبِّحْ بِاسْمِ رَبِّکَ الْعَظِیْمِ (الواقعۃ: 96) ” تو اے محبوب تم اپنے عظمت والے رب کے نام کی پاکی بولو۔“ تو رسول اللہ صلی اللہ علیہ وسلم نے ہم سے فرمایا: تم یہ تسبیح رکوع میں پڑھ لیا کرو اور جب یہ آیت نازل ہوئی: سَبِّحِ اسْمَ رَبِّکَ الْاَعْلَی ” اپنے رب کے نام کی پاکی بولو جو سب سے بلند ہے۔“ آپ نے فرمایا: تم اس کو سجدے میں پڑھ لیا کرو۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3825]