سیدنا میسرہ رضی اللہ عنہ سے مروی ہے کہ سورۃ الجمعہ کی یہ پہلی آیت: یُسَبِّحُ لِلّٰہِ مَا فِی السَّمٰوٰتِ وَ مَا فِی الْاَرْضِ الْمَلِکِ الْقُدُّوْسِ الْعَزِیْزِ الْحَکِیْمِ (الجمعۃ: 1) (کا مفہوم) تورات میں 700 آیات میں درج ہے۔ [المستدرك على الصحيحين/كِتَابُ التَّفْسِيرِ/حدیث: 3850]

سیدنا عبداللہ بن عباس رضی اللہ عنہما فرماتے ہیں: ابوجہل، نبی اکرم صلی اللہ علیہ وسلم کے پاس سے گزرا۔ اس وقت آپ نماز ادا فرما رہے تھے۔ اس نے کہا: اے محمد! کیا میں نے تجھے نماز پڑھنے سے منع نہیں کیا تھا اور تم اچھی طرح جانتے ہو کہ مجھ سے بڑی مجلس والا کوئی نہیں ہے۔ نبی اکرم صلی اللہ علیہ وسلم نے اس کو جھڑک دیا تو سیدنا جبریل امین نے کہا: فَلْیَدْعُ نَادِیَہٗ سَنَدْعُ الزَّبَانِیَۃَ (العلق: 17، 18) ” اب پکارے اپنی مجلس کو، ابھی ہم سپاہیوں کو بلاتے ہیں۔“ خدا کی قسم! وہ اگر اپنی جماعت کو بلا لیتا تو اس کو عذاب کے سپاہی (فرشتے) پکڑ لیتے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3851]