سیدنا عبداللہ بن عباس رضی اللہ عنہما فرماتے ہیں: اللہ تعالیٰ نے سب سے پہلے قلم کو پیدا فرمایا۔ اس کو کہا: لکھ! اس نے کہا: کیا لکھوں؟ اللہ تعالیٰ نے فرمایا: قدر۔ اس نے اس دن سے لے کر قیامت تک جو کچھ ہونے والا تھا، سب لکھ دیا۔ آپ فرماتے ہیں: اس کا عرش پانی پر تھا پھر پانی کے بخارات اوپر کی جانب اٹھے، ان سے آسمان بنائے گئے پھر مچھلی بنائی گئی، اس پر زمین بچھائی گئی اور زمین مچھلی کی پشت پر تھی۔ مچھلی تڑپنے لگی، پھر زمین کو کھینچ دیا گیا اور پہاڑوں کے ساتھ اس کو مضبوط کیا گیا کیونکہ پہاڑ زمین پر فخر کرتے ہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3882]

سیدنا عبداللہ بن عباس رضی اللہ عنہما: نٓ وَ الْقَلَمِ وَ مَا یَسْطُرُوْنَ (القلم: 1) ” نون، قلم اور اس کے لکھے کی قسم۔“ (کے بارے میں) فرماتے ہیں (کہ اس میں یسطرون کا مطلب) ” یکتبون “ ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3883]