سیدنا ابوہریرہ رضی اللہ عنہ سے اللہ تعالیٰ کے فرمان ﴿وَالْمُرْسَلَاتِ عُرْفًا﴾ [سورة المرسلات: 1] کے متعلق روایت ہے، انہوں نے فرمایا: اس سے مراد وہ فرشتے ہیں جو نیکی اور بھلائی کے احکامات دے کر بھیجے گئے ہیں۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3930]

خالد بن عرعرہ رحمہ اللہ سے روایت ہے کہ ایک شخص سیدنا علی رضی اللہ عنہ کے پاس کھڑا ہوا اور پوچھا: «العاصفات عصفاً» سے کیا مراد ہے؟ انہوں نے فرمایا: اس سے مراد تند و تیز ہوائیں ہیں۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3931]

سیدنا عبداللہ بن عباس رضی اللہ عنہما سے روایت ہے کہ ان سے اس آیت ﴿تَرْمِي بِشَرَرٍ كَالْقَصَرِ﴾ [سورة المرسلات: 32] کے بارے میں سوال کیا گیا تو انہوں نے فرمایا: ہم زمانہ جاہلیت میں دو یا تین ہاتھ لمبی لکڑیوں کو اکٹھا کر کے ڈھیر لگاتے تھے اور سردیوں کے لیے اسے سنبھال کر رکھتے تھے، جسے ہم «القَصَرَ» کہتے تھے۔ راوی کہتے ہیں: میں نے ابن عباس رضی اللہ عنہما کو یہ بھی کہتے سنا جب ان سے ﴿جِمَالَتٌ صُفْرٌ﴾ [سورة المرسلات: 33] کے بارے میں پوچھا گیا تو انہوں نے فرمایا: اس سے مراد بحری جہازوں کے وہ موٹے رسے ہیں جنہیں ایک دوسرے کے ساتھ جوڑ دیا جاتا ہے یہاں تک کہ وہ مردوں کے دھڑ کی طرح موٹے ہو جاتے ہیں۔
یہ حدیث صحیح الاسناد ہے لیکن شیخین نے اسے روایت نہیں کیا! [المستدرك على الصحيحين/كِتَابُ التَّفْسِيرِ/حدیث: 3932]