سیدنا عبداللہ بن مسعود رضی اللہ عنہ نے اللہ تعالیٰ کے ارشاد: لّٰبِثِیْنَ فِیْھَآ اَحْقَابًا (النبا: 23) ” اس میں قرنوں (مدتوں) رہیں گے۔“ (کی تفسیر میں) فرماتے ہیں: ایک حقب 80 برس کا ہوتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3934]

سیدنا عبداللہ بن عباس رضی اللہ عنہما اللہ تعالیٰ کے ارشاد: وَّ کَاْسًا دِھَاقًا (النبا: 34) ” اور چھلکتا جام۔“ کے متعلق فرماتے ہیں: یہ مسلسل اور بھرے ہوئے جام ہوں گے۔ عکرمہ رضی اللہ عنہ کہتے ہیں: سیدنا عبداللہ بن عباس رضی اللہ عنہما کو میں نے کئی مرتبہ یہ دعا مانگتے سنا ہے (یا اللہ وہ جام) ہمیں پلا اور ہمارے لئے بھر دے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3935]