طلحہ بن عمرو رضی اللہ عنہ سے اللہ تعالیٰ کے ارشاد: اَوْ اِطْعٰمٌ فِیْ یَوْمٍ ذِیْ مَسْغَبَۃٍ (البلد: 14) ” یا بھوک کے دن کھانا دینا “ کے متعلق پوچھا گیا تو آپ نے فرمایا: محمد بن المنکور نے سیدنا جابر بن عبداللہ رضی اللہ عنہ سے روایت کیا ہے کہ رسول اللہ صلی اللہ علیہ وسلم نے ارشاد فرمایا: مغفرت کے اسباب میں سے کسی بھوکے مسلمان کو کھانا کھلانا (بھی) ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3979]

سیدنا عبداللہ بن عباس رضی اللہ عنہما (اللہ تعالیٰ کے ارشاد) اَوْ مِسْکِیْنًا ذَا مَتْرَبَۃٍ (یا خاک نشین مسکین کو) (کی تفسیر بیان کرتے ہوئے) فرماتے ہیں: (اس سے مراد وہ شخص ہے) جو بے گھر دربدر ہو۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3980]

سیدنا عبداللہ بن عباس رضی اللہ عنہما، اللہ تعالیٰ کے ارشاد: اَوْ مِسْکِیْنًا ذَا مَتْرَبَۃٍ کے متعلق فرماتے ہیں (اس سے مراد) وہ مٹی ہے جس بچنا مشکل ہو۔ [المستدرك على الصحيحين/كِتَابُ التَّفْسِيرِ/حدیث: 3981]