سیدنا عبداللہ بن عباس رضی اللہ عنہما فرماتے ہیں: ذبیح سیدنا اسماعیل علیہ السلام ہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ: تَوَارِيخِ الْمُتَقَدِّمِينَ مِنَ الْأَنْبِيَاءِ وَالْمُرْسَلِينَ/حدیث: 4078]

سیدنا عبداللہ بن عمر رضی اللہ عنہما ” وَفَدَیْنَاہُ بِذِبْحٍ عَظِیْم “ کے متعلق فرماتے ہیں: یہ سیدنا اسماعیل علیہ السلام تھے جب سیدنا ابراہیم علیہ السلام نے مینڈھا ذبح کیا تھا۔ [المستدرك على الصحيحين/كِتَابُ: تَوَارِيخِ الْمُتَقَدِّمِينَ مِنَ الْأَنْبِيَاءِ وَالْمُرْسَلِينَ/حدیث: 4079]

عبداللہ بن سعید ضابحی فرماتے ہیں: ہم سیدنا معاویہ بن ابوسفیان رضی اللہ عنہ کی مجلس میں حاضر ہوئے اور سیدنا اسماعیل علیہ السلام اور سیدنا اسحاق علیہ السلام کا تذکرہ چل نکلا۔ بعض کا موقف تھا کہ ذبیح سیدنا اسماعیل علیہ السلام ہیں اور بعض کا موقف تھا کہ اسحاق علیہ السلام ذبیح ہیں۔ تو معاویہ نے کہا: تم واقف کار کے پاس پہنچے ہو۔ ہم رسول اللہ صلی اللہ علیہ وسلم کی خدمت میں حاضر تھے کہ آپ کے پاس ایک دیہاتی آیا اور بولا: ملک خشک سالی کا شکار ہے، پانی ختم ہو چکا ہے، مال ہلاک ہو گئے اور اولادیں برباد ہو رہی ہیں۔ اللہ تعالیٰ نے آپ کو جو مال غنیمت عطا فرمایا ہے، اس میں سے کچھ مجھے بھی عطا فرمائیے۔ اے دو ذبیحوں کے بیٹے۔ اس پر رسول اللہ صلی اللہ علیہ وسلم مسکرا دئیے اور اس کو منع نہ فرمایا: ہم نے کہا: اے امیرالمومنین رضی اللہ عنہ وہ دو ذبیح کون کون ہیں؟ انہوں نے فرمایا: جب سیدنا عبدالمطلب کو چاہ زم زم کھودنے کا حکم دیا گیا تو انہوں نے اللہ تعالیٰ کی بارگاہ میں یہ نذر مانی تھی کہ اگر اللہ تعالیٰ یہ معاملہ آسان فرما دے تو وہ اپنے ایک بیٹے کی قربانی دیں گے (جب کنواں کھود لیا گیا تو) آپ نے اپنے بیٹوں میں قرعہ اندازی کی اور قرعہ سیدنا عبداللہ کے نام نکلا۔ سیدنا عبدالمطلب نے ان کو ذبح کرنے کا ارادہ کر لیا لیکن بنی مخزوم میں سے آپ کے ماموؤں نے آپ کو اس عمل سے منع کر دیا اور بولے: اپنے رب کو راضی کر لو اور اپنے بیٹے کا فدیہ دے دو چنانچہ سیدنا عبدالمطلب نے 100 اونٹنیاں فدیہ میں دیں۔ آپ فرماتے ہیں۔ ایک ذبیح یہ ہوئے اور دوسرے سیدنا اسماعیل علیہ السلام۔ [المستدرك على الصحيحين/كِتَابُ: تَوَارِيخِ الْمُتَقَدِّمِينَ مِنَ الْأَنْبِيَاءِ وَالْمُرْسَلِينَ/حدیث: 4080]

سیدنا عبداللہ بن عباس رضی اللہ عنہما فرماتے ہیں: جن کا فدیہ (مینڈھے کے طور پر) دیا گیا تھا وہ سیدنا اسماعیل علیہ السلام ہیں جبکہ یہودی یہ سمجھتے ہیں کہ وہ سیدنا اسحاق علیہ السلام ہیں۔ یہودی جھوٹے ہیں۔ [المستدرك على الصحيحين/كِتَابُ: تَوَارِيخِ الْمُتَقَدِّمِينَ مِنَ الْأَنْبِيَاءِ وَالْمُرْسَلِينَ/حدیث: 4081]

سیدنا عبداللہ بن عباس رضی اللہ عنہما فرماتے ہیں: جن کا فدیہ اللہ تعالیٰ نے ذبح عظیم کے ساتھ دیا وہ سیدنا اسماعیل علیہ السلام ہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ: تَوَارِيخِ الْمُتَقَدِّمِينَ مِنَ الْأَنْبِيَاءِ وَالْمُرْسَلِينَ/حدیث: 4082]

محمد بن کعب قرظی کہتے ہیں: اللہ تعالیٰ نے سیدنا ابراہیم علیہ السلام کو جس بیٹے کے ذبح کا حکم دیا تھا وہ سیدنا اسماعیل علیہ السلام تھے اور قرآن کریم میں سیدنا ابراہیم علیہ السلام کا جو واقعہ ہے اور ان کو اپنے بیٹے کے ذبح کا جو حکم ہوا ہے اس سے بھی پتہ چلتا ہے کہ ” ذبیح “ سیدنا اسماعیل علیہ السلام ہی ہیں کیونکہ قرآن کریم نے جب سیدنا ابراہیم علیہ السلام کے بیٹے کے ذبح کا قصہ مکمل کر لیا تو اس کے بعد فرمایا: وَ بَشَّرْٰنہُ بِاِسْحٰقَ نَبِیًّا مِّنَ الصّٰلِحِیْنَ (الصافات: 112) ” اور ہم نے اسے خوشخبری دی اسحاق کی کہ غیب کی خبریں بتانے والا نبی ہمارے قربِ خاص کے سزاواروں میں۔“ پھر (ایک اور مقام پر) فرمایا: فَبَشَّرْٰنھَا بِاِسْحٰقَ وَ مِنْ وَّرَآءِ اِسْحٰقَ یَعْقُوْبَ (ھود: 71) ” تو ہم نے اسے اسحاق کی خوشخبری دی اور اسحاق کے پیچھے یعقوب کی۔“ یعنی بیٹے کی اور پوتے کی۔ چنانچہ سیدنا اسحاق کے ذبح کا حکم نہیں تھا بلکہ ان کے متعلق تو اللہ نے وعدہ کیا تھا اور جس کے ذبح کا حکم دیا تھا وہ سیدنا اسماعیل ہیں۔ [المستدرك على الصحيحين/كِتَابُ: تَوَارِيخِ الْمُتَقَدِّمِينَ مِنَ الْأَنْبِيَاءِ وَالْمُرْسَلِينَ/حدیث: 4083]