سیدنا بریر باہلی رضی اللہ عنہ بیان کرتے ہیں کہ میں نے سیدنا عبداللہ بن عباس رضی اللہ عنہما سے سیدنا شعیب علیہ السلام کی قوم کی ہلاکت اور اللہ تعالیٰ کے اس ارشاد کی وضاحت پوچھی: فَاَخَذَھُمْ عَذَابُ یَوْمِ الظُّلَّۃِ اِنَّہٗ کَانَ عَذَابٌ عَظِیْم (الشعراء: 189) ” تو انہیں شامیانے والے دن کے عذاب نے آ لیا، بیشک وہ بڑے دن کا عذاب تھا۔“ تو آپ نے فرمایا: اللہ تعالیٰ نے ان پر سخت گرمی بھیجی، جس سے ان کا دم گھٹنے لگا۔ یہ لوگ اپنے کمروں کے اندر گھس گئے لیکن اس گرمی نے وہاں پہنچ کر بھی ان کی سانس بند کر دی پھر یہ گھروں سے باہر میدانوں کی طرف بھاگ نکلے تو اللہ تعالیٰ نے ایک بادل بھیجا جس نے ان پر چھاؤں کر دی، ان لوگوں نے اس کے سائے میں ٹھنڈک اور سکون محسوس کیا تو انہوں نے خود ایک دوسرے کو آوازیں دے دے کر وہاں اکٹھے کر لیا، جب وہ تمام لوگ اس بادل کے نیچے جمع ہو گئے تو اللہ تعالیٰ نے ان پر آگ برسا دی۔ سیدنا عبداللہ بن عباس رضی اللہ عنہما فرماتے ہیں: یہ تھا شامیانے کے دن کا عذاب ” بے شک وہ بڑے دن کا عذاب تھا۔“ [المستدرك على الصحيحين/كِتَابُ: تَوَارِيخِ الْمُتَقَدِّمِينَ مِنَ الْأَنْبِيَاءِ وَالْمُرْسَلِينَ/حدیث: 4118]

سیدنا قتادہ رضی اللہ عنہ فرماتے ہیں: اللہ تعالیٰ نے سیدنا شعیب علیہ السلام کو دو امتوں کی طرف بھیجا تھا۔ ایک آپ کی قوم اہل مدین اور دوسرے اصحاب الایکہ۔ پھلدار درختوں کا ایک جھنڈ تھا۔ جب اللہ تعالیٰ نے ان کو عذاب دینے کا ارادہ فرمایا: تو اللہ تعالیٰ نے ان پر سخت گرمی بھیجی اور ان کے لئے بادل کی صورت میں عذاب بلند کیا، جب وہ بادل ان کے قریب آیا تو یہ لوگ ٹھنڈ حاصل کرنے کی امید سے اس کی طرف نکلے، جب یہ لوگ اس کے عین نیچے آ گئے تو (اس میں آگ) ان پر برس پڑی۔ اسی کے متعلق اللہ تعالیٰ نے فرمایا: فَاَخَذَھُمْ عَذَابُ یَوْمِ الظُّلَّۃ ” تو انہیں شامیانے والے دن کے عذاب نے آ لیا۔“ [المستدرك على الصحيحين/كِتَابُ: تَوَارِيخِ الْمُتَقَدِّمِينَ مِنَ الْأَنْبِيَاءِ وَالْمُرْسَلِينَ/حدیث: 4119]

سیدنا مجاہد رضی اللہ عنہ، اللہ تعالیٰ کے ارشاد عَذَابُ یَوْمِ الظُّلَّۃ کا مطلب ہے ” عذاب کا دھواں۔“ [المستدرك على الصحيحين/كِتَابُ: تَوَارِيخِ الْمُتَقَدِّمِينَ مِنَ الْأَنْبِيَاءِ وَالْمُرْسَلِينَ/حدیث: 4120]

سیدنا زید بن اسلم رضی اللہ عنہ اللہ تعالیٰ کے ارشاد: اَصَلٰوتُکَ تَاْمُرُکَ اَنْ نَّتْرُکَ مَا یَعْبُدُ ٰابَآؤُنَآ اَوْ اَنْ نَّفْعَلَ فِیْٓ اَمْوَالِنَا مَا نَشٰٓؤُا (ھود: 87) ” بولے اے شعیب! کیا تمہاری نماز تمہیں یہ حکم دیتی ہے کہ ہم اپنے باپ دادا کے خداؤں کو چھوڑ دیں یا اپنے مال میں جو چاہیں نہ کریں “ کے متعلق فرماتے ہیں: سیدنا شعیب علیہ السلام ان کو جن چیزوں سے روکتے تھے منجملہ ان کے یہ بھی تھی کہ درہم کم کرنے یا دراہم کاٹنے سے ان کو روکتے تھے۔ تو ان کو شامیانے کے دن کے عذاب نے آ لیا، بے شک وہ بڑے دن کا عذاب تھا۔ آپ فرماتے ہیں: اللہ تعالیٰ نے ان کی جانب بادل کا ایک ٹکڑا بھیجا پھر اللہ تعالیٰ نے سورج کو حکم دیا، اس نے زمین پر شدید گرمی پیدا کر دی جس کی وجہ سے وہ سب اس بادل کی طرف بھاگ نکلے۔ جب وہ سب کے سب اس بادل کے نیچے جمع ہو گئے تو اللہ تعالیٰ نے وہ بادل ان پر کھول دیا اور گرمی نے ان کو بھون کر رکھ دیا تو وہ لوگ اس طرح جل گئے جیسے دیگچی میں ٹڈی (ایک پرندہ) جلتا ہے۔ [المستدرك على الصحيحين/كِتَابُ: تَوَارِيخِ الْمُتَقَدِّمِينَ مِنَ الْأَنْبِيَاءِ وَالْمُرْسَلِينَ/حدیث: 4121]

سیدنا عبداللہ بن عباس رضی اللہ عنہما فرماتے ہیں: جو عالم تمہیں عذاب یوم الظلۃ کی تفصیل بیان کرے تم اس کو جھٹلا دو۔ (کیونکہ اس کی تفصیل اللہ تعالیٰ کے سوا کسی کو معلوم نہیں) [المستدرك على الصحيحين/كِتَابُ: تَوَارِيخِ الْمُتَقَدِّمِينَ مِنَ الْأَنْبِيَاءِ وَالْمُرْسَلِينَ/حدیث: 4122]