سیدنا زبیر رضی اللہ عنہ فرماتے ہیں: ان کی ملاقات مسلمانوں کی ایک جماعت سے ہوئی کہ شام میں تجارت کیا کرتے تھے، جب ان کو رسول اللہ صلی اللہ علیہ وسلم کی ہجرت کا پتہ چلا تو یہ لوگ مکہ سے آنے والوں سے ملتے (اور پوچھتے کہ) انہوں نے رسول اللہ صلی اللہ علیہ وسلم اور سیدنا ابوبکر رضی اللہ عنہ کو سفید کپڑوں میں دیکھا ہے؟ اور جب مدینہ منورہ میں اطلاع پہنچی کہ رسول اللہ صلی اللہ علیہ وسلم روانہ ہو چکے ہیں تو یہ لوگ روزانہ صبح سویرے باہر ٹیلوں پر آ کر حضور صلی اللہ علیہ وسلم کا انتظار کرنے لگ جاتے، حالانکہ دوپہر کی گرمی بہت شدید ہوتی تھی، اس کے باوجود طویل انتظار کرتے، پھر وہ لوگ اپنے گھروں کو لوٹ جاتے، ایک یہودی بھی اپنے قلعہ نما گھر سے جھانک کر آپ صلی اللہ علیہ وسلم کی راہ تکا کرتا تھا، ایک دن اس کی نظر رسول اللہ صلی اللہ علیہ وسلم پر اور آپ صلی اللہ علیہ وسلم کے اصحاب پر پڑ گئی، ان کی سفیدی سے سراب چھٹ رہا تھا، اس یہودی سے رہا نہ گیا اور بلند آواز سے بولا: اے اہل عرب! یہ رہا تمہارا وہ ساتھی جس کا تم آج تک انتظار کرتے رہے ہو، تو مسلمانوں نے اپنے ہتھیار سنبھال لیے اور ” ظہرالحرہ “ نامی ایک ٹیلے پر پہنچ کر آپ صلی اللہ علیہ وسلم کا والہانہ استقبال کیا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْهِجْرَةِ/حدیث: 4323]

سیدنا عبداللہ بن عمر رضی اللہ عنہما فرماتے ہیں: رسول اللہ صلی اللہ علیہ وسلم بنی عمرو بن عوف کی مسجد یعنی مسجد قباء میں تشریف لائے۔ تو مسلمان حضور صلی اللہ علیہ وسلم کی خدمت میں حاضر ہو کر آپ کو سلام کرتے۔ سیدنا عبداللہ بن عمر رضی اللہ عنہما فرماتے ہیں: صہیب بھی ان کے ساتھ بارگاہ عالی میں حاضر ہوئے تھے۔ میں نے ان سے پوچھا: جب حضور صلی اللہ علیہ وسلم کو سلام کیا جاتا اور آپ اس وقت نماز میں ہوتے تو آپ علیہ السلام کیا کیا کرتے تھے؟ انہوں نے کہا: آپ صلی اللہ علیہ وسلم ہاتھ سے اشارہ کر دیا کرتے تھے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الْهِجْرَةِ/حدیث: 4324]