سیدنا عمر رضی اللہ عنہ سے روایت ہے کہ وہ ایک دفعہ سیدہ فاطمہ رضی اللہ عنہا کی خدمت میں حاضر ہوئے اور عرض کی: اے فاطمہ! خدا کی قسم! میں نے تجھ سے زیادہ کسی کو رسول اللہ صلی اللہ علیہ وسلم کا محبوب نہیں پایا اور خدا کی قسم! تیرے والد سے بڑھ کر میں کسی سے محبت نہیں کرتا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح الاسناد ہے لیکن انہوں نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4789]

سیدنا ابوثعلبہ خشنی رضی اللہ عنہ فرماتے ہیں: رسول اللہ صلی اللہ علیہ وسلم (کی یہ عادت کریمہ تھی کہ آپ) جب بھی کسی سفر یا غزوہ سے واپس تشریف لاتے تو (پہلے) مسجد میں آتے اور دو رکعت نفل ادا کرتے پھر سیدہ فاطمہ رضی اللہ عنہا کے پاس (جاتے، اس کے بعد اپنی ازواج مطہرات کے پاس تشریف لاتے (ایک دفعہ کا ذکر ہے کہ) آپ صلی اللہ علیہ وسلم (ایک سفر سے واپس لوٹے تو حسب عادت مسجد میں آ کر نوافل ادا کئے اس کے بعد آپ) مسجد شریف سے سیدہ فاطمہ رضی اللہ عنہا کے گھر تشریف لے) گئے، سیدہ فاطمہ رضی اللہ عنہا نے گھر کے دروازے پر نبی اکرم صلی اللہ علیہ وسلم کا استقبال کیا اور حضور صلی اللہ علیہ وسلم کے دہان مبارک کا بوسہ لیا۔ اس وقت سیدہ فاطمہ رضی اللہ عنہا آبدیدہ ہو گئیں، نبی اکرم صلی اللہ علیہ وسلم نے رونے کی وجہ پوچھی تو عرض کی: یا رسول اللہ صلی اللہ علیہ وسلم میں آپ کو تھکا ہوا، پریشان حال دیکھ رہی ہوں، آپ کا لباس مبارک کس قدر بوسیدہ ہو چکا ہے۔ حضور صلی اللہ علیہ وسلم نے فرمایا: تم مت رو، کیونکہ اللہ تعالیٰ نے تمہارے والد کو ایسے معاملہ کے ساتھ مبعوث فرمایا ہے کہ اس روئے زمین پر ہر چھوٹے بڑے گھر میں اللہ تعالیٰ اس کے ذریعے اسلام کو داخل فرمائے گا، (گھر والوں کی) عزت کے ساتھ یا ذلت کے ساتھ، حتی کہ وہ وہاں تک پہنچ جائے گا جہاں رات پہنچتی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4790]