سیدنا عمر رضی اللہ عنہ سے روایت ہے کہ وہ رسول اللہ صلی اللہ علیہ وسلم کی صاحبزادی سیدہ فاطمہ رضی اللہ عنہا کے پاس تشریف لائے اور فرمایا: اے فاطمہ! اللہ کی قسم، میں نے رسول اللہ صلی اللہ علیہ وسلم کے نزدیک آپ سے زیادہ محبوب کسی کو نہیں دیکھا، اور اللہ کی قسم، آپ کے والد صلی اللہ علیہ وسلم کے بعد تمام لوگوں میں سے میرے نزدیک آپ سے زیادہ محبوب کوئی نہیں۔
یہ حدیث شیخین کی شرط پر صحیح الاسناد ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4789]

سیدنا ابو ثعلبہ خشنی رضی اللہ عنہ سے روایت ہے، وہ کہتے ہیں کہ رسول اللہ صلی اللہ علیہ وسلم جب کسی غزوے یا سفر سے واپس تشریف لاتے تو پہلے مسجد میں داخل ہو کر دو رکعت نماز ادا فرماتے، پھر سیدہ فاطمہ رضی اللہ عنہا کے ہاں تشریف لے جاتے اور اس کے بعد اپنی ازواج مطہرات کے پاس جاتے۔ پس جب آپ صلی اللہ علیہ وسلم (ایک بار) واپس آئے اور مسجد سے نکلے تو سیدہ فاطمہ رضی اللہ عنہا نے گھر کے دروازے پر آپ صلی اللہ علیہ وسلم کا استقبال کیا، وہ آپ صلی اللہ علیہ وسلم کے دہن مبارک اور آنکھوں کا بوسہ لینے لگیں اور رونے لگیں۔ آپ صلی اللہ علیہ وسلم نے ان سے دریافت فرمایا: ”اے بیٹی! تمہیں کس چیز نے رلایا ہے؟“ انہوں نے عرض کی: اے اللہ کے رسول صلی اللہ علیہ وسلم ! میں آپ کو پراگندہ حال اور تھکا ہوا دیکھ رہی ہوں اور آپ کے لباس بھی بوسیدہ ہو گئے ہیں۔ آپ صلی اللہ علیہ وسلم نے فرمایا: ”پس تم روؤ نہیں، کیونکہ اللہ عزوجل نے تمہارے باپ کو ایک ایسے کام (دین) کے لیے مبعوث فرمایا ہے جو روئے زمین پر مٹی کے بنے کسی گھر یا بالوں کے بنے کسی خیمے کو نہیں چھوڑے گا مگر اللہ اس میں (اسلام کے ذریعے) عزت یا (کفر کے ذریعے) ذلت داخل کر دے گا، یہاں تک کہ یہ دین وہاں تک پہنچ کر رہے گا جہاں تک رات پہنچتی ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4790]