سیدہ اسماء بنت عمیس رضی اللہ عنہا سے روایت ہے، انہوں نے کہا: میں رسول اللہ صلی اللہ علیہ وسلم کی صاحبزادی سیدہ فاطمہ رضی اللہ عنہا کی رخصتی میں موجود تھی، جب صبح ہوئی تو نبی کریم صلی اللہ علیہ وسلم دروازے پر تشریف لائے اور فرمایا: ”اے ام ایمن! میرے بھائی کو بلاؤ“، انہوں نے عرض کیا: وہ آپ کے بھائی ہیں اور آپ اپنی بیٹی کا نکاح ان سے کر رہے ہیں؟! آپ صلی اللہ علیہ وسلم نے فرمایا: ”ہاں اے ام ایمن!“ پھر سیدنا علی تشریف لائے تو نبی کریم صلی اللہ علیہ وسلم نے ان پر پانی کے چھینٹے مارے اور ان کے لیے دعا فرمائی، پھر فرمایا: ”فاطمہ کو میرے پاس بلاؤ“، اسماء رضی اللہ عنہا کہتی ہیں کہ وہ حیا کی وجہ سے لڑکھڑاتی ہوئی آئیں، تو رسول اللہ صلی اللہ علیہ وسلم نے ان سے فرمایا: ”پرسکون رہو، میں نے تمہارا نکاح اپنے اہل بیت میں سے مجھے سب سے زیادہ محبوب شخص سے کیا ہے“، اسماء کہتی ہیں کہ نبی کریم صلی اللہ علیہ وسلم نے ان پر بھی پانی چھڑکا، پھر رسول اللہ صلی اللہ علیہ وسلم واپس مڑے تو اپنے سامنے ایک سایہ دیکھا، دریافت فرمایا: ”یہ کون ہے؟“ میں نے عرض کیا: میں اسماء ہوں، آپ صلی اللہ علیہ وسلم نے پوچھا: ”اسماء بنت عمیس؟“ میں نے عرض کیا: جی ہاں، آپ صلی اللہ علیہ وسلم نے فرمایا: ”کیا تم رسول اللہ کی بیٹی کی رخصتی کے لیے آئی ہو؟“ میں نے عرض کیا: جی ہاں، تو آپ صلی اللہ علیہ وسلم نے میرے لیے دعا فرمائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4807]

ام المؤمنین سیدہ عائشہ رضی اللہ عنہا سے روایت ہے، انہوں نے فرمایا: میں نے گفتگو اور بات چیت کے انداز میں سیدہ فاطمہ رضی اللہ عنہا سے بڑھ کر کسی کو رسول اللہ صلی اللہ علیہ وسلم کے مشابہ نہیں دیکھا، اور جب وہ آپ صلی اللہ علیہ وسلم کے پاس تشریف لاتیں تو آپ صلی اللہ علیہ وسلم ان کے استقبال کے لیے کھڑے ہو جاتے، ان کا بوسہ لیتے، انہیں خوش آمدید کہتے اور ان کا ہاتھ تھام کر اپنی جگہ پر بٹھاتے، اسی طرح جب رسول اللہ صلی اللہ علیہ وسلم ان کے پاس تشریف لے جاتے تو وہ آپ صلی اللہ علیہ وسلم کے استقبال کے لیے کھڑی ہو جاتیں اور آپ صلی اللہ علیہ وسلم کے دستِ مبارک کا بوسہ لیتیں۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4808]