سیدنا علی رضی اللہ عنہ سے روایت ہے کہ جب حسن کی ولادت ہوئی تو میں نے ان کا نام ”حرب“ رکھا، نبی کریم صلی اللہ علیہ وسلم نے مجھ سے دریافت فرمایا: ”تم نے میرے بیٹے کا کیا نام رکھا ہے؟“ میں نے عرض کیا: حرب، آپ صلی اللہ علیہ وسلم نے فرمایا: ”(نہیں) وہ حسن ہے“، پھر جب حسین کی ولادت ہوئی تو میں نے ان کا نام ”حرب“ رکھا، نبی کریم صلی اللہ علیہ وسلم نے دریافت فرمایا: ”تم نے میرے بیٹے کا کیا نام رکھا ہے؟“ میں نے عرض کیا: حرب، آپ صلی اللہ علیہ وسلم نے فرمایا: ”(نہیں) وہ حسین ہے“، پھر جب محسن کی ولادت ہوئی تو آپ صلی اللہ علیہ وسلم نے فرمایا: ”تم نے میرے بیٹے کا کیا نام رکھا ہے؟“ میں نے عرض کیا: حرب، آپ صلی اللہ علیہ وسلم نے فرمایا: ”وہ محسن ہے“، پھر نبی کریم صلی اللہ علیہ وسلم نے ارشاد فرمایا: ”میں نے اپنے ان بیٹوں کے نام ہارون علیہ السلام کے بیٹوں کے ناموں پر شبر، شبیر اور مشبر رکھے ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4839]

عقبہ بن حارث سے روایت ہے کہ سیدنا ابوبکر صدیق رضی اللہ عنہ نے سیدنا حسن بن علی رضی اللہ عنہما سے ملاقات کی، انہیں اپنے سینے سے لگایا اور فرمایا: ”میرے باپ آپ پر فدا ہوں، یہ نبی ( صلی اللہ علیہ وسلم ) کے مشابہ ہے، علی کے مشابہ نہیں“، اور سیدنا علی رضی اللہ عنہ (یہ سن کر) مسکرا رہے تھے۔
یہ حدیث شیخین کی شرط پر صحیح ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4840]

سیدنا ابوہریرہ رضی اللہ عنہ سے روایت ہے کہ انہوں نے سیدنا حسن بن علی رضی اللہ عنہما سے ملاقات کی اور کہا: میں نے رسول اللہ صلی اللہ علیہ وسلم کو آپ کے شکم مبارک کا بوسہ لیتے ہوئے دیکھا ہے، لہٰذا آپ وہ جگہ ظاہر کریں جس کا رسول اللہ صلی اللہ علیہ وسلم نے بوسہ لیا تھا تاکہ میں بھی اسے چوم لوں، راوی کہتے ہیں: تو حسن رضی اللہ عنہ نے وہ جگہ (اپنے پیٹ سے کپڑا ہٹا کر) ظاہر کر دی اور انہوں نے اسے چوم لیا۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4841]

وہب ابوجحیفہ رضی اللہ عنہ سے روایت ہے، انہوں نے کہا: میں نے رسول اللہ صلی اللہ علیہ وسلم کی زیارت کی ہے اور حسن بن علی رضی اللہ عنہما آپ صلی اللہ علیہ وسلم کے مشابہ تھے۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا! اور اس کی ایک صحیح شاہد حدیث بھی موجود ہے: [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4842]