سیدنا انس بن مالک رضی اللہ عنہ سے روایت ہے کہ سیدنا علی رضی اللہ عنہ کی اولاد میں سے سیدنا حسن رضی اللہ عنہ سے بڑھ کر کوئی رسول اللہ صلی اللہ علیہ وسلم کے مشابہ نہ تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4843]

عبد اللہ بن عبید بن عمیر سے روایت ہے کہ سیدنا حسن بن علی رضی اللہ عنہما نے 25 حج پیدل چل کر ادا کیے جبکہ ان کی قیمتی سواریاں (نحیب اونٹنیاں) ان کے ساتھ (بغیر سوار کے) ہانکی جاتی تھیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4844]

قتادہ سے روایت ہے کہ سیدہ فاطمہ رضی اللہ عنہا کے ہاں سیدنا حسن رضی اللہ عنہ کی ولادت غزوہ احد کے دو سال بعد ہوئی، جبکہ غزوہ احد اور نبی کریم صلی اللہ علیہ وسلم کی مدینہ تشریف آوری کے درمیان دو سال، چھ ماہ اور پندرہ دن کا فاصلہ تھا، اس طرح ہجری تاریخ کے مطابق حسن رضی اللہ عنہ کی ولادت 4 سال، 6 ماہ اور 15 دن پر ہوئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4845]

ابن واقد سے روایت ہے کہ ابو محمد سیدنا حسن بن علی بن ابی طالب رضی اللہ عنہما کی وفات ربیع الاول سن 49 ہجری میں ہوئی اور ان کی نمازِ جنازہ سعید بن العاص نے پڑھائی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4846]

سیدنا ابوہریرہ رضی اللہ عنہ سے روایت ہے کہ میں اس شخص (حسن رضی اللہ عنہ) سے اس وقت سے ہمیشہ محبت کرتا ہوں جب سے میں نے رسول اللہ صلی اللہ علیہ وسلم کو ان کے ساتھ وہ سلوک کرتے دیکھا جو میں نے دیکھا، میں نے حسن کو نبی کریم صلی اللہ علیہ وسلم کی گود میں دیکھا جبکہ وہ اپنی انگلیاں نبی کریم صلی اللہ علیہ وسلم کی داڑھی مبارک میں ڈال رہے تھے اور نبی کریم صلی اللہ علیہ وسلم اپنی زبان ان کے منہ میں ڈال رہے تھے، پھر آپ صلی اللہ علیہ وسلم نے فرمایا: «اللَّهُمَّ إِنِّي أُحِبُّهُ فَأَحِبَّهُ» ”اے اللہ! میں اس سے محبت کرتا ہوں پس تو بھی اس سے محبت فرما۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4847]